भांगरभूंय | प्रतिनिधी
साळ पुनर्वसनच्या सरकारी मुळाव्या विद्यालयाचो उपक्रम
भांगरभूंय । प्रतिनिधी
दिवचलः उपक्रमशील विद्यालय म्हूण नांव जोडिल्ल्या साळ पुनर्वसनच्या सरकारी मुळाव्या विद्यालयाचो रानभाजी उत्सव उमेदीन मनयलो.
जैवविविधतायेन गिरेस्त आशिल्ल्या दिवचलच्या साळ गांवांत आशिल्ली एक ल्हान, गांवगिरी शाळा. मणेरी, कसय- दोडामार्ग, खोलपें, पुनर्वसन, कुमयामळ, हेदूस ह्या वाड्या वयलीं, गांवांतली परंपरीक साबार तरांच्या शाकभाजयेंच्या खोल मेरेन रुजिल्ल्या गिन्यानाचो तपशील साळ पुनर्वसन शाळेंत आयोजीत केल्ले रानभाजी उत्सवांत पळोवपाक मेळ्ळो. एके पिळगे कडल्यान दुसरे पिळगे मेरेन व्हरपी परंपरीक रानभाजयांची रांदपाची पद्दतीचें गिन्यान तिगोवन दवरचे खातीर आनी समाज वावर करपाक एक मुखेल व्यक्ती म्हूण पालक वर्गांतली एक बायल मार्गदर्शन करता. भाजयांच्या पुश्टीक फायद्यांची नदर तांचे कडेन आसता.
खूब खेपे आमी आडनदर केल्ल्या भाजपांचेर ती बायल लक्ष दिता. हाचोच प्रत्यय पावसाळी रानभाजी उत्सवांत दिसून आयली. निरोगी आहारा खातीर रानभाजयांचें म्हत्व वाडोवनपी तशेंच कांय विशिश्ट रानभाजयो आनी तांचें भलायके खातीर खूबशे फायदे सांगपी हो उत्सव. रानभाजयांचें पर्यावरणीय म्हत्व आनी पर्यावरण जागरुकताय तशेंच जैवविविधताय राखून दवरपाचो यत्न करचे खातीर आमी आमचे शाळेंत हो रानभाजी उत्सव आयोजीत केल्लो, अशें शाळेचे प्रभारी मुख्याध्यापक धाकटू पाटील हांणी सांगलें. मुख्याध्यापक धाकटू पाटील हांचे वांगडा शिक्षक संकेत नायक, स्मिता राऊळ आनी सुष्मिता ढवळे ह्या उत्सवाचें आयोजन आनी वेवस्थापन करतात. संस्कृती, भलायकी आनी पर्यावरणाचो उत्सव म्हूण रानभाजी उत्सवा कडेन आमी पळोवपाक शकतात. परंपरीक गिन्यान तिगोवपाचें आनी फुडारा खातीर शाश्वत पद्दतींक उर्बा दिवपाचें काम ह्या रानभाजी उत्सवांतल्यान जालें. भाजयां मदीं कुड्डूक, तायखिळो, तेरें, अळू, काणकीचें कोंब, चिवार हांच्यो भाजयो रांदिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
