तिस्क- उसगांवच्या पुलीस आवट पोस्टाची अवस्था बाबत

भांगरभूंय | प्रतिनिधी

पुलीस कर्मचार्‍यांक सोंसचे पडटात त्रास

फोंडें, प्रतिनिधी: तिस्क – उसगांवचे पुलीस आवट पोस्ट इमारतीची सामकी बाबत अवस्था जाल्ल्यान पुलीस कर्मचार्‍यांक समस्यांक तोंड दिवचें पडटा. इमारतीची दुरुस्ती करूंक नाशिल्ल्यान पावसांत पांख्यांतल्यान उदक गळटा. इमारतीचे पयले माळये वेलो स्लॅब कोसळपाचे प्रकार अदीं मदीं घडतूच आसतात. दुरुस्ती करपा वांगडा वाठारांत उद्देगीक वसणूक आनी खाण पठ्यांतले लोकांचे वेवस्थे खातीर सरकारान पुलीस आवट पोस्टाचो दर्जो वाडोवन हांगा पुलीस स्टेशन सुरू करपाची मागणी लोक करतात.
धारबांदोडें आनी उसगांव पंचायत वाठार खण पट्यांत येतात. फाटल्या कांय वर्सां सावन उसगांव वाठारांत अपघात घडटात. बारीक-सारीक कागाळी पुलीस आवट येतात. आवट पोस्टार वट्ट १० कर्मचारी आसात. हातूंत हवालदारा सयत कर्मचारी वर्ग आनी गृहरक्षक दवरला. पयले माळयेर ५ क्वाॅटर्स वापरा बगर पडून आसात. तांचीय दुरुस्ती करपाची गरज आसा. पावसांत इमारतीच्या पांख्याचे कुडके कोसळपाचे प्रकार घडटात. शौचालयाच्या स्लॅबाचे कुडके अदीं-मदीं पडटात. ताका लागून पुलिसांक धोको निर्माण जाला. दारां आनी जनेलांतल्यान सोरोप सहज भितर सरतात. कांय पुलीस ड्युटी सोंपले उपरांत हांगा विसव घेतना सोरोप भितर येवन तांची न्हिद खळ्ळ्या.

उसगांव पंचायत वाठारांत एमआरएफ, नेस्ले, पी अँड जी आनी हेर संवसारीक दर्जाच्यो कंपन्यो आसात. विवीध कंपन्यांनी व्हडा प्रमाणांत बिगर गोंयकार कामगार आसात. हेर कडेनूय बिगर गोंयकार काम करतात. ताका लागून ह्या वाठारांत गुन्यांवांत वाड जावपाक लागल्या. खण बंद आसूनय अपघातांचो आंकडो वाडला. तातूंत म्हादय आनी दुदसागर न्हंयेंत बुडून मरण येवपी घडणुकोय वाडल्यात. सेगीत धांवपळीत आशिल्ल्या पुलीस कर्मचार्‍यांक कार्यालयांत आयले उपरांत बरी सुविधाय मेळप गरजेचें. फोंडें पुलीस हद्दींत शिरोडें, बेतोड्यां, म्हाड्डोळ, फर्मागुडी, कुंडय, माशेल आनी तिस्क – उसगांवचे आवट पोस्ट कार्यरत आसात. तांतल्या म्हाड्डोळच्या पुलीस आवट पोस्टाचो दर्जो वाडोवन पुलीस स्टेशनांत रुपांतर केलां.
उसगांवची पंच मनीषा उसगांवकार हांणी सांगलें : इमारतीची बाबत अवस्था जाल्ल्यान पुलिसांक कार्यालयांत रावप कठीण जालां. पुलिसांकूच सुविधा दिवपाक अपेशी थारिल्ले सरकार लोकांच्यो समस्या कशें सोडयतलें? सरकारान हे विशीं पावलां उबारपाची गरज आसा.