भांगरभूंय | प्रतिनिधी
गोमंतक ऊस उत्पादक संघटणेची सरकाराक शिटकावणी
फोंडें, प्रतिनिधी: संजीवनी साकर कारखानो सुरु करपाचें आस्वासन दिवन सरकारान ऊस उत्पादकांक सलायनाचेर दवरल्यात. बंद अवस्थेंत आशिल्ल्या कारखान्याक ५ वर्सां पुराय जावपाक पावल्यांत. फुडल्या १५ दिसांनी सरकार कारखान्या विशीं ठोस धोरण स्पश्ट करिना जाल्यार उच्च न्यायालयांत न्याय मागतले, असो निर्णय बुधवारा जाल्ले बसकेंत गोमंतक ऊस उत्पादक संघटणेच्या पदाधिकार्यांनी घेतला.
गोमंतक ऊस उत्पादक संघटणेचे अध्यक्ष राजेंद्र देसाय हांचे अध्यक्षते खाला कारखान्याच्या सभाघरांत खास बसका जाली. बसकेंत फ्रान्सीस मास्कारेन्हास, हर्षद प्रभुदेसाय आनी हेर सुमार २० परस चड पदाधिकारी हजर आशिल्ले.
बसके उपरांत पत्रकारांक म्हायती दितना राजेंद्र देसाय हांणी सांगलें, कारखानो बंद जावन ५ वर्सां पुराय जावपाच्या मार्गाचेर आसात. ऊस उत्पादकांचो फुडार सध्या काळखांत आसा. कारखानो सुरु करपा विशीं सरकार धोरण जाहीर करिना. कारखानो सुरु जावचो म्हूण जायते फावट आंदोलनां केलीं. मात सरकारान आजूनय ऊस उत्पादकांक सलायनाचेर दवरल्याच. फुडाल्या १५ दिसांनी जर सरकारान कारखान्या विशीं धोरण जाहीर करीना जाल्यार उच्च न्यायालयात याचिका दाखल करतले. ताचे पयलीं मुख्यमंत्री, कृषी मंत्री, कृषी संचालक आनी हेर संबंदीतांक नोटीस दितले.
हर्षद प्रभुदेसाय हांणी सांगलें : कारखान्या विशीं चर्चा करपाक मुख्यमंत्री, मंत्री तशेंच आमदार वेळ दिना. हाचे वयल्यान ऊस उत्पादकांची स्थिती गंभीर जाल्ल्याचें दिसता. राज्यांतली ऊस शेती तिगोवप सामकें गरजेचें. सरकारा कडेन ऊस उत्पादक भीक मागिनात. हक्काची मागणी करतात. ताका लागून फुडल्या कांय दिसांनी संघटणां खर निर्णय घेवपाचे तयारेंत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
