भांगरभूंय | प्रतिनिधी
सुपौला, खबरां संस्था: बिहारच्या सुपौल जिल्ह्यांतल्या लालपट्टी- त्रिवेणीगंज गांवांत आयज बुधवारा ३१ जुलयाक एक धक्को दिवपी घडणूक घडली. एके खाजगी नर्सरींत शिकपी पाच वर्सां पिरायेच्या विद्यार्थ्यान तिसरेंत शिकपी १० वर्सां पिरायेच्या चल्याचेर फार मारलो. गुळी त्या चल्याच्या दाव्या पांयांत घुसली. शाळेच्या दप्तरांत पांच वर्सांचो भुरगो पिस्तूल घेवन आयिल्लो. मजगतीं, जखमी विद्यार्थ्याच्या पांयांत घुशिल्ली गुळी दोतोरांनी भायर काडल्या. ताची भलायकी बरी आसा.
हे घडणुके विशीं शाळेन पुलिसांक कळयलें. उपरांत पुलिसांनी चवकशी सुरू केली. विद्यार्थ्यांक पिस्तूल खंयच्यान मेळ्ळें हाची चवकशी पुलीस करतात. प्रार्थनेच्या कांय वेळा पयलीं ही घडणूक घडली. आरोपी विद्यार्थ्याचो बापूय हे शाळेंत सुरक्षा रक्षक म्हणून काम करतालो, अशें लोकांनी सांगलां.
बापूय पुताक घेवन फरार
जखमी विद्यार्थ्याच्या नात्यांतल्या लोकांनी सांगलें की आमकां शाळेच्या मुख्याध्यापकाचो फोन आयलो. उपरांत फार मारपी विद्यार्थ्याचो बापूय शाळेंत गेलो. ताणें घडणुकेची म्हायती घेतली. मेजाचेर आशिल्लें पिस्तूल उखलून आपल्या पुताक घेवन तो थंयच्यान पळून गेलो. पुलीस त्या दोगांयचो सोद घेतात. भुरग्याचो बापूय सायकलीन शाळेंत आयिल्लो. सायकल शाळे कडेन सांडून तो थंयच्यान पळून गेला.
जखमी भुरग्याच्या कुटुंबाक धक्को
फुडाराक अशी घडणूक घडची न्हय म्हणून शाळा आनी पुलीस प्रशासनान हे घडणुकेची पुराय चवकशी करची अशी मागणी जखमी विद्यार्थ्याच्या कुटुंबियांनी केल्या. हे घडणुके उपरांत जखमी विद्यार्थ्याच्या पालकांक धक्को बसला. ल्हान भुरगो अशें काम करपाक शकता हाचेर तांचो विस्वास बसना. आरोपी भुरग्याच्या पालकाक अटक करपाची मागणी तांणी पुलिसांक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
