भांगरभूंय | प्रतिनिधी
नवी दिल्ली, खबरां संस्था ः सध्या जमनींक भांगराचें न्हय, तर प्लॅटिनमाचें मोल आसा. जमनीच्या ल्हान कुडक्याक पसून लाखांनी रुपया फारीक करचे पडटात. ताका लागून दरेका राज्यांत कांय लोक, राजकी फुडारी जमनीचेर जमनी विकीत सुटल्यात. एका जाण्टे बायलेक चड काळ चलिल्ली एक कायदेशीर झूज खूब फायदेशीर थारली. ह्या प्रकरणांत तिका 7 कोटींची जमीन 3.75 लाख रुपयांक मेळ्ळी. पयलीं गिरायक न्यायालयांत, उपरांत उच्च न्यायालयांत आनी निमाणें सर्वोच्च न्यायालयांत पाविल्लें हें प्रकरण निमाणे बायलेक फायद्याचें थारलें.
नेमकें प्रकरण कितें?
लता जैन हिणें 1988 वर्सा गाजियाबादांत जमनीचो एक कुडको विकत घेतिल्लो. तिका थंय नर्सिंग होम सुरू करपाचें आशिल्लें. जमनी खातीर तिणें 50 हजार रुपया आगावू रक्कम दिल्ली. तेन्ना ही डील 3 लाख 75 हजार रुपयांक थारायिल्ली. जमनीचो दर चौखण मिटराक 350 रुपया आशिल्लो. इंद्रपुरम वाठारांत हो प्लॉट आशिल्लो. पूण जैन हिणें ही जमीन बुक करपाची प्रक्रिया पुराय केल्या उपरांत गाजियाबाद विकास प्राधिकरणान (जीडीए) ते जमनी विशीं वाद आसा, असो दावो केलो.
जीडीए जमनीच्या वेव्हारा खातीर जैन हिणें दिल्ली रक्कम परत करपाक तयार आशिल्ली. पूण जैन आपले भुमिकेचेर ठाम आशिल्ली. तिणें रोखडीच जीडीए आड गिरायक न्यायालयांत याचिका दाखल केली. हें प्रकरण जायतीं वर्सां प्रलंबीत उरल्या उपरांत 2009 वर्सा गिरायक न्यायालयान जैन हिच्या वटेन निकाल दिलो. पूण ताचे आड जीडीएन अलाहाबाद उच्च न्यायालयांत अपील केलें.
मजगतीं, हे प्रकरण इतलो वेळ प्रलंबीत दवरून राज्य सरकाराच्या संबंदीत आयोगाक ही जमीन पयलींच कोणाक विकल्या अशी म्हायती दिवंक नाशिल्ल्यान अलाहाबाद उच्च न्यायालयान जीडीएचे कान पिळ्ळे. उपरांत जीडीएन थेट सर्वोच्च न्यायालयांत अपील केलें. 5 एप्रील 2010 दिसा सर्वोच्च न्यायालयान उच्च न्यायालयाच्या निर्णयाक मान्यताय दिवन जीडीए कडेन संबंदीत 500 चौखण मिटर प्लॉट जैन हिका दर चौखण मिटराक 350 रुपया दरान दिवपाचो आदेश दिलो. हाचे भायर तिका दोन म्हयन्यां भितर एक लाख रुपया लुकसाण भरपाय दिवपाचेय सांगलें. हालींच जाल्ले सुनावणेंत सर्वोच्च न्यायालयान जीडीएक ह्या प्रकरणांत जमीन हस्तांतराची प्रक्रिया पुराय करपाचे निर्देश दिले.
मजगतीं, 1988 वर्सा लता जैन हिणें 50 हजार रुपयांक बूक केल्लो प्लॉट आयज सुमार 7 कोटी रुपया मोलाचो आसा. तेन्ना दर चौखण मिटराक 350 रुपया दरान घेतिल्ल्या ह्या प्लॉटाचो दर आयज दर चौखण मिटराक 1.3 लाख रुपया थारायला. देखून चड काळ चलिल्ली ही कायदेशीर झूज लता जैन हांचें खातीर फायदेशीर थारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
