भांगरभूंय | प्रतिनिधी
भारताच्या दादल्यांच्या हॉकी पंगडान आयर्लेण्ड पंगडाक 2-0 असो हारयलो. भारता वतीन दोनूय गोल मुखेली हरमनप्रीत सिंगान केले. ब गटांत भारतान दुसरें जैत जोडलें. एक मॅच बादाबाद उरिल्ली. अशे तरेन सात गुणां सयत बॅल्जियम आनी ऑस्ट्रेलिया ह्या पंगडांच्या मुखार गेलो. पूण, तांकां अजून दरेकी 2 मॅची खेळपाच्यो आसात.
गुरजंत सिंग आनी मनदीप सिंग हांणी आयर्लेण्डाच्या डिफॅन्स फळयेक नाकापुरो करून सोडलें. तांचो ताळमेळ उत्कृश्ट आशिल्लो. गोल करपा खातीर मनदीपान वन टू वन स्थिती निर्माण केल्ली आनी बॉल आडावपा खातीर आयर्लेणाच्या गोलकिपराक मुखार येवचें पडलें. ताची ही चूक भारताच्या फायद्याची थारली आनी भारताक पॅनल्टी स्ट्रोक मेळ्ळो. हरमनप्रीत सिंगान सहज गोल करून भारताक 11व्या मिनटाक 1-0 अशी आघाडी मेळोवन दिली. भारतान पयल्या क्वॉर्टरांत आपलो शेक दवरलो.
ब्रेका उपरांत लेगीत भारतान प्रतिस्पर्धी पंगडाच्या सर्कलांत हल्ले करीत आसले. तरी पूण, पॅनल्टी कॉर्नराचेर गोल करपाक येवपी अपेस हे मॅचींत लेगीत कायम उरलें. भारतान पयल्या 15 मिनटांनी तीन पॅनल्टी कॉर्नर व्हगडायले. 19व्या मिनटाक हरमनप्रीतान फिल्ड गोल करून आपलो आनी पंगडाचो दुसरो गोल नोंदयलो. हरमनप्रीतान अजून मेरेन चार गोल केल्यात.
तिसऱ्या क्वॉर्टराच्या पांचव्या मिनटाक भारतान मैदानी गोल करपाची एक बरी संद व्हगडायली.
गोलकीपर श्रीजेशान बरें प्रदर्शन केलें. ताणें आयर्लेण्डाचे साबार हल्ले परतावन लायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
