भांगरभूंय | प्रतिनिधी
भारतान तीन टी-20 मॅचींचे माळेंत येजमान श्रीलंका पंगडाचो 3-0 असो धूप केलो. काल तिसरे आनी निमाणे मॅचींत सुपर ओव्हरींत जैत जोडलें. भारतान पयलीं बॅटींग करून निर्धारीत 20 ओव्हरींनी 9 विकेटी व्हगडावन 137 धांवड्यो केल्यो. मोखीचो फाटलाव करपी श्रीलंका पंगडाक 20 ओव्हरींनी 9 विकेटी व्हगडावन 137 धांवड्यो करप शक्य जाल्यो आनी अशे तरेन मॅच टाय जाली.
सुपर ओव्हरींत श्रीलंकेक 2 विकेटी व्हगडावन फकत दोनूच धांवड्यो करप शक्य जाल्यो. जैता खातीर गरजेच्यो तीन धांवड्यो करून भारतान जैत जोडलें.
मजगतीं, टॉस हारल्या उपरांत पयलीं बॅटींग करपी भारताची सुरवात बरी जाली ना. दुसरे ओव्हरींत यशस्वी जयस्वाल (10) बाद जालो. फुडले ओव्हरींत संजू सॅमसन शुन्याचेर तंबूंत परतलो. चवथे ओव्हरींत रिंकू सिंग एक धांवडी करून बाद जालो. पूण, शुभमन गिलान एक बाजू सांबाळून धरली. मुखेली सूर्यकुमार यादवान गिला वांगडा मेळून डाव सांबाळपाचो यत्न केलो.
सवे ओव्हरींत असिथ फर्नांडोन सूर्याक (8) बाद केलो. ते उपरांत शिवम दुबे फकत 13 धांवड्यो करून बाद जालो. ते उपरांत गील आनी रियान पराग हांचे मदीं सवे विकेटी खातीर 54 धांवड्यांची भागिदारी जाली. सवे विकेटीच्या रुपान गील बाद जालो. ताणें 37 बॉलांनी 38 धांवड्यो केल्यो.
रियान परागान 18 बॉलांनी दोन सके आनी एका चवक्याचे मजतीन 26 धांवड्यो केल्यो. वॉशिंग्टन सुंदरान 18 बॉलांनी 25 धांवड्यो केल्यो. रवी बिश्नोई 8 धांवड्यो करून नाबाद रावलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
