भांगरभूंय | प्रतिनिधी
आमदार रेजिनाल्ड हांच्या लेखी प्रस्नाक मंत्री शिरोडकार हांची जाप
पणजी : म्हादय लवादाच्या निवाड्याक आव्हान दिवपी गोंय सरकाराची याचिका सर्वोच्च न्यायालयांत 5 ऑगस्टाक सुनावणेक येवपाची शक्यताय आसा. सर्वोच्च न्यायालयाच्या 5 ऑगस्टाक जावपी सुनावणेचे वळेरीचेर म्हादय याचिकेचो आस्पाव आसा. आमदार आलेक्स रेजिनाल्ड हांच्या लेखी प्रस्नाक उदका स्रोत मंत्री सुभाष शिरोडकार हांणी ही लेखी जाप दिल्या.
कर्नाटकाचे मुख्यमंत्री के. सिद्दरामय्या हांच्या फुडारपणा खाला शिश्टमंडळान 30 जून 2024 दिसा प्रधानमंत्री नरेंद्र मोदी हांची भेट घेतली. कळसा प्रकल्पाक मान्यताय दिवपाची मागणी कर्नाटकाच्या शिश्टमंडळान केल्या. हाचे उपरांत म्हादय वाटावपा खातीर गोंय सरकारान कसल्यो उपाय येवजण्यो केल्यात, असो प्रस्न रेजिनाल्ड हांणी लिचारिल्लो. हाका मंत्री सुभाष शिरोडकार हांणी ही लेखी जाप दिली.
कळसा आनी भांडुरा प्रकल्पा खातीर कसलेच तरेचीं कामां कर्नाटका कडल्यान सुरू नात. हाका लागून खासा उपाय येवजणेची गरज ना, अशें लेखी जापेंत म्हणलां. कणकुंबींत कर्नाटका कडल्यान सुरू आशिल्ल्या कानालाचें काम आडावपाक सरकार कितें करता? असोय प्रस्न तांणी केल्लो.
म्हादयचें उदक व्हरपा खातीर कर्नाटकाचे जे यत्न सुरू आसात, ताचेर गोंय सरकारान कर्नाटका आड दोन अवमान याचिका घाल्यात. ह्यो सगल्यो याचिका 5 ऑगस्ट सावन सुरू जावपी सुनावणेचे वळेरेंत आसा. म्हादय लवादांतूय गोंयान कर्नाटका आड याचिका दाखल केल्या.
म्हादय संबंदी गोंयचे हीत सांबाळपा खातीर केंद्रीय फुडाऱ्यांची भेट घेवपाचो सध्या तरी प्रस्ताव ना, अशेंय उदका स्रोत मंत्री सुभाष शिरोडकार हांणी जाप दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
