भांगरभूंय | प्रतिनिधी
पणजीः फाटल्या कांय वर्सांत गोंयांत कॅन्सराचे दुयेंती वाडत आसात. 2019 ते 2023 ह्या काळांत राज्यांत दर म्हयन्याक सरासरी कॅन्सराचे दुयेंती 139 आसात
दर दिसा सरासरी 4.54 दुयेंती सांपडल्यात. केंद्रीय भलायकी राज्यमंत्री प्रतापराव जाधव हांणी राज्यसभेंत दिल्ल्या लेखी जापेंतल्यान ही म्हायती मेळ्ळ्या. हे संबंदीं एक अतारांकीत प्रस्न खासदार मदन राठोड हांणी मांडलो.
2019 ते 2023 ह्या पांच वर्सांत गोंयांत वट्ट 8296 कॅन्सर दुयेंती सांपडले. मजगतीं, दर वर्सा दुयेंतींचो आंकडो वाडत आसा. 2019 वर्सा राज्यांत 1591 कॅन्सर दुयेंती सांपडले. 2020 वर्सा 1618 आनी 1652 दुयेंती मेळ्ळे. 2022 वर्सा 48 ते 1700 दुयेंती वाडले. 2023 वर्सा सगळ्यांत चड कॅन्सर दुयेंती 1735 आशिल्ले.
2019-2023 ह्या काळांत पुराय देशांत 71 लाख 35 हजार 440 कॅन्सर दुयेंती सांपडले. हाचो अर्थ ह्या काळांत दर म्हयन्याक सरासरी 1 लाख 18 हजार 924 दुयेंती आनी दिसाक सरासरी 3837 दुयेंती मेळ्ळे. ह्या काळांत उत्तर प्रदेशांत सगळ्यांत चड कॅन्सराचे दुयेंती आशिल्ले. थंय दर वर्सा सरासरी 2 लाख दुयेंती सांपडटाले. हाचे उपरांत महाराष्ट्रांत सरासरी 1.1 लाख दुयेंती आसात आनी अस्तंत बंगालांत वर्साक सरासरी 1 लाख दुयेंती आसात अशें जापांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
