भांगरभूंय | प्रतिनिधी
मुख्यमंत्री डॉ. प्रमोद सावंत हांची लेखी जाप
पणजीः गोंय राज्याचें नवें वस्तूसंग्रहालय पोरणें गोंया येतलें. ह्या वस्तूसंग्रहालयाच्या बांदकाम खातीर निधी मंजूर करपाक राज्य सरकारान केंद्राक सविस्तर प्रकल्प अहवाल (डीपीआर) धाडला, अशी म्हायती मुख्यमंत्री डॉ. प्रमोद सावंत हांणी विधानसभेंत लेखी जापेंतल्यान दिल्या.
गोंयांत नवें वस्तूसंग्रहालय बांदपाचो विचार बी आसा? असो प्रस्न मुरगांवचे आमदार संकल्प आमोणकार हांणी विचारिल्लो. हाचेर जाप दितना मुख्यमंत्र्यानी विधानसभेच्या पटलार सांगलें की एला, पोरणें गोंया, गोंय राज्य वस्तूसंग्रहालयाची नवी इमारत येवपाची आसा. 9520 स्क्वेर मिटर सुवातेंत ही
इमारत येतली आनी शेतकी खात्यान ही प्रस्तावीत सुवात संग्रहालय खात्याचे सुवादीन केल्या.
नवें वस्तूसंग्रहालय इमारती खातीर संग्रहालय निधी येवजणे खाला अर्थीक सहाय्याची मागणी करपा खातीर 20 मार्च 2024 दिसा गोंय सरकान केंद्राच्या संस्कृती मंत्रालयाक डीपीआर धाडला. ते भायर हे नवे इमारती खातीर भांडवल खर्चा खाला राज्य सरकारान रु. 10 कोटी मंजूर केल्यात. तशेंच जीएसआयडीसीन अजून मेरेन ह्या इमारतीच्या कामाचे टेंडर अजून काडूंक ना.
खाजगी वस्तूसंग्रहालयांक अर्थीक मजत दिवपा खातीर संग्रहालय संचालनालयान येवजण चालीक लायिल्ली. पूण 2018 उपरांत ही येवजण बंद उडयली. आतां मेरेन गोंयच्या 4 संग्रहालयांनी हे येवजणेचो लाव घेवन, सरकारान 35 लाख रुपया मोडल्यात.
साल्वादोर द मुंद हावसीस ऑफ गोवा हे खातीर 2017 वर्सा रु. 7.46 लाख, गोंय चक्र संग्रहालय बाणावले खातीर 2018 वर्सा रु. 25 लाख, बीग फूट संग्रहालय लोटली 2018 वर्सा रु. 9.95 लाख, पिलार सेमिनरी संग्रहालय पिर्ळण खातीर 2018 वर्सा रु. 10 लाख इतलो निधी सरकारान दिला.
खाजगी संग्रहालया विशीं नवें धोरण वा येवजण चालीक लावपा खातीर संचालनालयान प्रक्रिया सुरू केल्या.
मजगतीं, राज्य सरकारचें संग्रहालय पणजे पाट्यार बाबत स्थितींत आशिल्लें. थंयचें संग्रहालय पोरण्या सचिवालयांत स्थलांतरीत केलां आनी थंय तात्पुरतें हें संग्रहालय चालीक लागलां. पणजे पाट्या वेली संग्रहालयाची इमारत मोडिल्ल्या कारणान नवी इमारत केन्ना जातली असो प्रश्न उप्रासतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
