भांगरभूंय | प्रतिनिधी
पणजी : सायबर गुन्यांवां विशीं आयज मंगळारा विधानसभा सभाघरांत आमदार आलेक्स रेजिनाल्ड हांणी विचारिल्ल्या प्रस्नाक जाप दितना मुख्यमंत्री डॉ. प्रमोद सावंत हांणी सायबर गुन्यांवांत आतां मेरेन गोंयकारांचे सुमार साडेतीन कोटी रुपया आडकल्ले. ते जप्त केल्यात. तांतल्या कांय जाणांक तांचे पयशे मेळ्ळ्यात.
प्रस्न जापेच्या काळांत आमदार आलेक्स रेजिनाल्ड हांणी सांगलें, राज्यांत सायबर गुन्यांव वाडतूच आसात. मात, विभागान आतां मेरेन असल्या प्रकरणांत एकल्याकूय अटक करूंक ना. हे विशीं मुख्यमंत्र्यान उलयतना सांगलें, सायबर गुन्यांव विभागांत सायबर गुन्यांवां विशीं आतां मेरेन ४५ कागाळी नोंद जाल्यात. बोगस फोन कॉल्स, वेबसायट्स अश्या जायत्या गजालीं वरवीं गोंयकारांचे सुमार साडेतीन कोटी रुपया सायबर भामट्यांनी चोरल्यात. ते जप्त केल्यात. कांय जाणांक लुटिल्ले पयशेय परतूय मेळ्ळ्यात. सायबर गुन्यांव आडावपा खातीर रायबंदरच्या सायबर गुन्यांव विभागांत २४ वरां कार्यरत लॅबाची स्थापना केल्या. फुडाल्या काळांत थंय कर्मचारी वाडोवपा खातीर नव्या तंत्रज्ञानाचोय आसपाव करतले अशें तांणी स्पश्ट केलें.
सायबर गुन्यांव आडावपा खातीर शाळा, महाविद्यालयां, पंचायत पांवड्यार वचून विद्यार्थी आनी जनते मदीं जागृताय करता. फुडल्या काळांतूय जागृतायेंत वाड करतले अशें मुख्यमंत्र्यान सांगलें.
१९३० क्रमांकाचेर फोन करचो
सायबर गुन्यांवांत फटवल्ल्या लोकांनी बेगोबेग १९३० ह्या क्रमांकाचेर फोन करून ते विशींची म्हायती दिवची. उपरांत तांचे कागाळीचेर काम सुरू जातलें आनी तांचे पयशे ज्या अकावंटाचेर गेल्यात थंयच्यान ते जप्त करतात. आपापलो अकावंट क्रमांक दिवन ते परतूय मेळोवं येतात, अशेंय डॉ. सावंत हांणी नमूद केलें.
लागींच्या पुलीस स्टेशनाचेरूय कागाळ करपाक मेळटली
सायबर गुन्यांवां विशींची कागाळ नोंद करपा खातीर रायबंदरच्या विभागांतूच वच्चें पडटलें काय लागसारच्या पुलीस स्टेशनाचेर कागाळ नोंद करपाक मेळटली असो प्रस्न आमदार निलेश काब्राल हांणी विचारिल्लो. ताचेर आपल्या लागसारच्या पुलीस स्टेशनांत ते विशींची कागाळ नोंद करपाक मेळटली अशें मुखार मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
