भांगरभूंय | प्रतिनिधी
वायनाड, खबरां संस्था: फाटल्या कांय दिसां सावन देशभर व्हड प्रमाणांत पावस पडटा. केरळांत पावसाचेर सांवार आयला. पावसाक लागून मंगळारा सकाळीं केरळांतल्या वायनाडांत पालसणां कोसळपाची घडणूक घडल्या. तातूंत १९ जाणांक मरण आयलां. तर शेंकड्यांनी लोक मातयेचे रांशी खाला आडकून उरिल्ल्याचो भंय आसा. एनडीआरएफ आनी थळाव्या प्रशासनान लोकांक वाटावपाचें काम सुरू केलां.
ही घडणूक मेप्पाडी वाठारांत घडल्या. दोन भुरग्यांकय मरण आयलां. मंगळारा मध्यान रातीं सुमार २ वरांचेर मेप्पाडी वाठारांत पालसणां कोसळपाची पयली घडणूक घडली. उपरांत फांतोडेर ४ वरांचे आनीक एक तीं कोसळ्ळीं.
मजगतीं, उजो पालोवपी दळ आनी राष्ट्रीय आपत्ती प्रतिसाद दळाचें गट घडणुके सुवातेर पावल्यात. तांणी झुजा पांवड्यार काम सुरू केलां. तशेंच एनडीआरएफचो अतिरिक्त पंगडय मदत काम करता.
हे दुर्घटनेंत जखमी जाल्ल्या १० ते १५ जाणांक हॉस्पिटलांत दाखल केल्यात. भलायकी खात्याचो पंगडय थळार पावला. वायुसेनेचीं दोन हेलिकॉप्टरांय पावल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
