भांगरभूंय | प्रतिनिधी
जालंधर, खबरां संस्था ः पंजाबांतल्यान परदेशांत वचपाक सोदपी गरीब बायलांक बनावट ट्रॅव्हल एजंट फटयतात. नोकरी व्हिसा आनी चड पगार दिवपाचें उतर दिवन तांकां पर्यटन व्हिसा घेवन ओमान, साउदी अरेबिया, मस्कत सारक्या देशांनी धाडटात अशें एसआयटीच्या चवकशेंत कळ्ळां. थंय मागीर तांचे पासपोर्ट, फोन जप्त करतात. ट्रॅव्हल एजंट अरबी भाशेंतल्या कंत्राटाचेर, प्रतिज्ञापत्राचेर तांची सय घेतात. फाटल्या वर्सा राज्यसभेंत हो प्रस्न मांडपी संत बलबीर सिंग सिचेवाल हांणी सांगलें, दोन वर्सांत 125 चलयांक परत हाडपा खातीर केंद्र सरकार आनी दूतावासांक पत्र बरयले. तातूंतल्यान 90 जाणा परतली. तशेंच चलयो आपली वळख उक्ती जावपाच्या भंयान पुलिसां कडेन वचप टाळटात.
सुटका जाल्ल्या मदल्या कांय जाणांनी सांगलें, 35 ते 40 हजार रुपयांची नोकरी दिता अशें सांगून बायलांची फटवणूक करतात. दर दिसा सकाळीं सावन रात मेरेन काम करप आनी रातच्या वेळार कुडींत बंद दवरताले. परत भारतांत वचपाचें आसल्यार देड लाख रुपया दिवन वच्चें अशेंय तें सांगतालें.
ह्या प्रकरणाची चवकशी करपी खाशेलो तपास पंगडाचे (एसआयटी) मुखेली रणधीर कुमार हांणी सांगलें, पंजाबांत बनावट ट्रॅव्हल एजंटां आड पंगड तयार केला. दर एका जिल्ह्यांत मानवी तस्करी विरोधी युनिट आसात. एजंट परवान्याचो तपशील सरकारी संकेतथळार मेळटा. ते भायर उरिल्ले एजंट बनावट आसात. परवानो तपासल्या उपरांतच परदेशांत वचपाचें थारावचें. आतां मेरेन ह्या प्रकरणांत 25 जाणांक अटक केल्या. तातूंत 19 बायलो आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
