भांगरभूंय | प्रतिनिधी
विनायक खेडेकारः धारगळे मनयली गुरुपुनव
भांगरभूंय । सांस्कृतीक प्रतिनिधी
पणजीः आमी खोशये खातीर जियेतात आनी संगितांतल्यान खोस मेळटा तशी आनी खंयच मेळना. संगीत संवसारांत गोंयचें संगीत ताल प्रधान आसात, अशें मत पद्मश्री विनायक खेडेकार हांणी उक्तायलें. तशेंच शिश्यांचें अज्ञान पयस करून ताका ज्ञानाचो मार्ग दाखयता तो गुरू, अशेंय तांणी सांगलें.
सर्गेस्त नारायण नावेलकार कला सांस्कृती संस्था, माशेल, पंडीत तुळशीदास नावेलकार शिश्य परिवार, कला आनी संस्कृती संचालनालय तशेंच धारगळ पंचायत हांच्या जोडपालवान आयतारा धारगळ पंचायत सभाघरांत पं. तुळशीदास नावेलकार हांचो भोवमान म्हूण गुरुपुनव कार्यावळ आयोजीत केल्ली. हे कार्यावळींत विनायक खेडेकार मुखेल सोयरे म्हूण उलयताले.
ह्या वेळार माचयेर पं. नावेलकार, सत्कारमुर्ती ज्येश्ठ तबलावादक पं. उल्हास वेलींगकार, ज्येश्ठ संगीत शिक्षक दामोदर भाई शेवडे, धारगळचे पंच भूषण नायक, शिश्य परिवाराचे अध्यक्ष दयानंद कांदोळकार हाजीर आशिल्ले. पद्मश्री खेडेकार हांचे हस्तुकीं पं. वेलींगकार हांचो ह्या वेळार सत्कार केलो.
पं. वेलींगकार हांणी सांगलें, संगीत ही देवाची देणगी. संगिताचे साधनेंतल्यान सिद्धी मेळटा. संगिताची मात तरी सेवा आपल्या हातांतल्यान घडल्या जाल्यार ती आपल्या गुरूक लागून. आपले ज्येश्ठ गुरुबंधू पं. नावेलकार हे गुणी कलाकार. तांचो चैतन्य दिवपी सांगात आपल्याक मेळ्ळा. ज्या पद्मश्री खेडाकार हांकां लागून आपणे नांव जोडलें, तांच्या हातांतल्यान आपलो सत्कार केलो हें आपलें भाग्य.
पं. नावेलकार हांणी सांगलें, बऱ्या नशिबान आपल्याक बरे गुरू मेळ्ळे. तांच्या सांगातान आपल्याक खूबश्यो गजाली शिकपाक मेळ्ळ्यो.
भूषण नायक हांणी सांगलें, गोंयचें गोंयकारपण तिगोवचे खातीर आमची संस्कृती तिगोवपाक जाय. आयज गोंयांत गोंयकारूच अल्पसंख्या जावपाचो भंय निर्माण जाला. गोंयची जमीन विकतात, ही हुस्क्याची गजाल.
पं. तुळशीदास नावेलकार हांचे वयले चित्रफितीचें पद्मश्री विनायक खेडेकार हांचे हस्तुकीं प्रकाशन जालें. ह्या वेळार पं. नावेलकार हांचो सत्कार तशेंच शिश्यांनी गुरुपुजन केलें. शरदिनी नावेलकार हांची व्हट भरून आनी भेटवस्तू दिवन तांचोय भोवमान केलो.
डॉ. गोविंद भगत हांणी सुत्रसंचालन केलें. सकाळच्या सत्रांत पार्थ कबीर फडते आनी संकेत संदीप सावळ हांचें तबला सहवादन जालें. ते उपरांत राया कोरगांवकार हांचें हार्मोनियम सोलोवादन जालें. सकाळच्या सत्राचो समारोप प्रवीण शिलकार आनी ओंकार च्यारी हांच्या नाट्यगीत गायनान जालो. सांजेच्या सत्रांत यतीन तळावलीकार, संकेत खलप, मिलिंद परब हांची तबलातरंग कार्यावळ जाली. सिद्धेश पवार (गायन), दत्तराज म्हाळशी (नगमा) हांणी साथसंगत केली. चैतन्य कुलकर्णी हांच्या गायनान समारोप जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
