भांगरभूंय | प्रतिनिधी
मुख्यमंत्री: इतिहासीक थळांचें फुडल्या वर्सा मेरेन नुतनीकरण
पणजी : आझाद मैदान, लोहिया मैदान, कुंकळ्ळेंचे १६ महानायकांचें स्मारक तशेंच शंभर वर्सां पुराय जावंक नाशिल्लीं इतिहासीक थळां आनी पुरातत्व स्थळां आनी अवशेश ‘कायदो १९७८’खाला येवपाक शकनात. ह्या सगळ्या इतिहासीक थळांचें फुडल्या वर्सा मेरेन नुतनीकरण करतले, सोमारा सभाघरांत विरोधी पक्ष फुडारी युरी आलेमाव हांणी प्रस्न जापेच्या काळांत विचारिल्ल्या प्रस्नाक जाप दितना मुख्यमंत्री डॉ. प्रमोद सावंत हांणी अशी हमी दिली.
लोहिया मैदान सध्या सोरो पियेतल्यांचो अड्डो जावन पडलां. आस्वासन दिवन लेगीत कुंकळ्ळेच्या स्मारक वाठाराचें नुतनीकरण जायना. ताका लागून राज्यांतल्या इतिहासीक थळांची राखण आनी जतनाय जावपा खातीर तीं पुरातत्व खात्याच्या कायद्या खाला हाडचीं, अशी मागणी आलेमाव हांणी केली.
हाका जाप दितना मुख्यमंत्री डॉ. सावंत हांणी, शंभर वर्सां पुराय जावंक नाशिल्लीं इतिहासीक थळां पुरातत्त्व खात्याच्या कायद्या खाला येनात. तशें केल्यार आझाद मैदान, लोहिया मैदानाचेर आंदोलन, उपोशण करपाक मेळचें ना. मागीर ताचो दोश विरोधक परत सरकाराकूच दितले. कुंकळ्ळेंच्या महानायकांच्या स्मारकांचो भाजप सरकारान पयलीं मान राखलो. सगळ्या इतिहासीक थळांचें भौशीक बांदकाम खात्या वतीन (पीडब्लूडी) फुडल्या वर्सा मेरेन नुतनीकरण करतले अशेंय तांणी नमूद केलें.
गोंय मुक्तींत म्हत्वाचें योगदान आशिल्ल्या राम मनोहर लोहियांचो इतिहास आदल्या सरकारांनी केन्नाच जनतेक सांगूंक ना. भाजप सरकार सत्तेर आयले उपरांत लोहियांच्या योगदानाची म्हायती दिवपी धडे णवी आनी इकरावेच्या पुस्तकांत आयले. तशेंच भाजप सरकारानूच कुंकळ्ळे १६ महानायकांचें स्मारक उबारलें. पुरातत्व आनी पुराभिलेख खात्याचे मंत्री सुभाष फळदेसाय हांणी युरी आलेमांव हांकां तोमणो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
