भांगरभूंय | प्रतिनिधी
करारा प्रमाण जीएमआराक सूट दिल्या : मुख्यमंत्री
पणजी : जीएमआर कंपनीक सूट दिवन सरकारान २०७ कोटींची येणावळ बुडयल्या, असा आरोप आमदार विजय सरदेसाय हांणी केलो. हाचेर, करारा प्रमाण जीएमआराक सूट दिल्ल्याचें मुख्यमंत्री डॉ. प्रमोद सावंत हांणी स्पश्ट केलें. सोमारा सकाळीं प्रस्न जापेच्या काळांत आमदार सरदेसाय हांणी मोपा विमानतळांतल्यान मेळपी येणावळीक मंत्रिमंडळान दिल्ली सूट आनी हरित पट्ट्याचो विशय सभाघरांत हाजीर केलो. ह्या विशया वयल्यान आमदार विजय सरदेसाय आनी मुख्यमंत्री डॉ. प्रमोद सावंत हांचे मदीं सोमारा पेटलें.
विमानतळासाठी जीएमआर कंपनीन जितलीं झाडां कांपलीं, तितलीं झाडां लावन पांचवो पट्टो तयार करपाचे निर्देश सर्वोच्च न्यायालयान दिल्ले. हे विशीं म्हायती अधिकार कायद्याखाला नागरी विमान येरादारी खात्यान दिल्ले म्हायती प्रमाण, विमानतळा खातीर कापून उडयिल्ल्या झाडांच्या बदला जीएमआरान सांखळे, दिवचल वाठारांत ५५ हजार झाडां लायल्यांत. ताका लागून हेर वाठारांत झाडां लावपाचो अर्थ पांचवो पट्टो अशें जाता काय असो प्रस्न सरदेसाय हांणी विचारलो.
तांणी सांगलें, जीएमआर कंपनी कडेन केल्ल्या करारा प्रमाण मे २०२४ सावन जीएमआर कंपनी कडल्यान सरकाराक ३६.९९ टक्के येणावळ येवपाती आशिल्ली. फाटलीं दोन वर्सां जीएमआरान विमानतळा वरवीं ५४५ कोटींची येणावळ मेळयल्या. तरी राज्य मंत्रिमंडळान बसकेंत जीएमआराक येणावळ दिवपाच्या दिसांनी सूट दिली. ताका लागून राज्य सरकाराचो २०७ कोटींची येणावळ बुडली.
मुख्यमंत्र्यांची जाप
मजगतीं, आमदार सरदेसाय हांच्या आरोपांक जाप दितना मुख्यमंत्री डॉ. सावंत हांणी, जीएमआर कंपनीक बेगोबेग पांचवो पट्टो तयार करपाचे निर्देश दितले, अशें स्पश्ट केलें. सर्वोच्च न्यायालयाच्या आदेशा प्रमाण ६३४ दीस आनी कोविडाक लागून १८० दिसांनी जीएमआराक येणावळी विशीं सूट दिल्ल्याचेंय तांणी नमूद केलें.
मोपा विमानतळा खातीर जमनी गेल्ल्यांक आजूनय लुकसाण भरपाय आनी भुमिहीन आशिल्ल्याचीं प्रमाणपत्रां मेळूंक नाशिल्ल्याचो दावोय ह्या वेळार आमदार सरदेसाय हांणी केलो. ताचेर जांणी गरजेचीं कागदपत्रां सादर केलीं तांकां शंभर टक्के लुकसाण भरपाय सयत भुमिहीन प्रमाणपत्रांय दिल्यांत. हेरांचे भरपाये विशींचे प्रक्रियेक वेग दितले, अशेंय मुख्यमंत्री डॉ. सावंत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
