भांगरभूंय | प्रतिनिधी
गोंय विद्यार्थी सुरक्षा धोरण तयार जातलें
पणजी, प्रतिनिधी : विद्यालयां वा शिक्षण संस्थांनी विद्यार्थ्यांच्या सुरक्षे खातीर सीसीटीव्ही कॅमेरे बसोवपाचो कसलोच प्रस्ताव शिक्षण खात्या कडेन ना. विद्यालयांनी विद्यार्थ्यांच्या सुरक्षे खातीर उपाय येवजण्यो आसा, अशी लेखी जाप मुख्यमंत्री डॉ. प्रमोद सावंत हांणी दिल्या. विद्यालयात विद्यार्थ्यांच्या सुरक्षे खातीर खासा धोरण तयार जातलें. धोरण तयार करपाचो वावर सुरू आसा, असो उल्लेख लेखी जापेत आसा. आमदार युरी आलेमांव हांच्या अतारांकीत प्रस्नाक शिक्षणमंत्री ह्या नात्यान मुख्यमंत्री डॉ. सावंत हांणी ही लेखी जाप दिल्या.
कुजिरा शिक्षण संकुलात समाज विरोधी घडणुको घडटा. हाका लागून विद्यार्थ्यांच्या सुरक्षे विशीं हुस्को निर्माण जाला. विद्यार्थ्यांच्या सुरक्षे खातीर कुजिरा शिक्षण संकुलात फावो ते प्रमाणात सुरक्षेचे उपाय आसा. समाज विरोधी घडणुको जाल्ल्याची कागाळ नोंद जावंक ना. कुजिरा संकुलात सीसीटीव्ही कॅमेरे पसून आसात. विद्यालयाच्या वेवस्थापनाक विद्यार्थ्यांच्या सुरक्षे विशीं योग्य ती जतनाय घेवपाचे निर्देश वेवस्थापनाक दिल्या.
विद्यालयांनी सीसीटीव्ही कॅमेरे बसोवपाचो प्रस्ताव नाशिल्ल्यान अर्थसंकल्पात सुद्दा तजवीज करूंक ना, अशें लेखी जापेत म्हणलां.
उच्च माध्यमिक विद्यालयांनी विद्यार्थ्यां मदीं झगडी जावपी व्हिडियो व्हायरल जाल्या. बऱ्याच वर्सां पयलीं वास्को एका विद्यालयान भायल्या मनशा कडल्यान विद्यार्थीनीचेर लैंगीक अत्याचार जावपाची घडणुक जाली. हाचे उपरांत विद्यार्थ्यांच्या सुरक्षे विशीं हुस्को निर्माण जालो. शिक्षणीक संस्थां भायर राखणे वणत उबारपा सयत सीसीटीव्ही कॅमेरे बसोवपाची मागणी जावपाक लागली. सीसीटीव्ही कॅमेरे बसोवपाचो मात सरकारा कडेन प्रस्ताव ना, अशें आतां स्पश्ट जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
