भांगरभूंय | प्रतिनिधी
सावंतवाडी, खबरां संस्था: सावंतवाडीच्या रोणापाल- सोनुर्ली अटंग्या रानांत २७ जुलयाक एक विदेशी बायल सांखळेन बांदिल्ले अवस्थेंत मेळ्ळी. ललिता कायी कुमार एस. अशें हे बायलेचें नांव. तिचेर सध्या ओरोस जिल्लो हॉस्पिटलांत उपचार सुरू आसात. ललिताही मूळ अमेरिकेची. सध्या ती तामिळनाडूंत रावताली.
हे घडणुके विशीं म्हायती मेळटांच पुलिसांनी घडणुके सुवातेर वचून बायलेची बांदिल्ल्या सांखळेंतल्यान सुटका केली. मात ही बायल रोणापाल मेरेन कशी आयली, हे विशीं पुलीस सोद घेतात. तिची भलायकी आजूनय सुदारूंक ना. तिचो जबाब नोंद करूंक नाशिल्ल्याची म्हायती पुलिसांनी दिल्या.
बायलेन घोवाचें नांव घेतलां
पुलिसांनी सुरवातेच्या तपासांत ते बायलेक कांय प्रस्न विचारले. तेन्ना ती बायल ही अवस्था आपल्या घोवान केल्ल्याचें सांगताली. सेगीत ती आपल्या घोवाचें नांव घेताली. हाचे वयल्यान पुलीस सध्या तिच्या कुटुंबियां विशीं म्हायती घेतात.
तीन दीस उपाशीं
हे बायलेच्या उजव्या पांयांक सांखळी घालून ती झाडाक लॉक केल्ली. तीन दीस उपाशीं राविल्ल्यान ती बायल उलोवपाचे परिस्थितींत नाशिल्ली. सोनुर्लीचे कांय राखणे गोरवां चरोवपाक रानांत गेल्ले तेन्ना तांकां हे बायलेचो आवाज आयकूंक आयलो. उपरांत त्या राखण्यान हे विशीं पुलिसांक म्हायती दिली. पुलिसांनी तिका बांदिल्ली सांखळी सोडोवन सावंतवाडी उपजिल्लो हॉस्पिटलांत दाखल केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
