भांगरभूंय | प्रतिनिधी
दोतोर आपल्या दुयेंतींक सदांच आपल्या उतरांनी अर्दो बरो करता, पूण खुबशा कर्मचाऱ्यांक अशें प्रोत्साहन भाशणांतल्यान, संवादांतल्यान तशें करप खूब कठीण. पूण मडगांवची दोतोर ज्योती हेगडे हें काम करता आनी हें सगलें हांसत खेळत खेळ घेवन करता. तांचे घरकार लेगीत अशे पद्दतीचें काम करता. तांचें नांव अमेय हेगडे. ते अभियंते. एखादो दुयेंती ज्योतीबायच्या मुखार आयलो तर तें ताका उर्बा दिवपाक शकता. पूण एका नामनेच्या कंपनीच्या कर्मचाऱ्यां मुखार तांकां संवादांतल्यान प्रोत्साहन दिवप ही कठीण गजाल लेगीत ज्योतीबायन करून दाखयल्या.
ज्योतीबायन डिजिटल मळार खूब वावर केला. ई- पुस्तकां तयार करप, मडगांवां 9 ते 12 वर्सां पिरायेच्या भुरग्यां खातीर चॅम्प अभ्यासक्रम चालीक लावप… ताचो बरो परिणाम भुरग्यां मदीं दिसूंक लागला, अशें पालकांचें म्हणणें आसा. तिणें आपल्या घोवा वांगडा अभ्यास करून भुरग्यां खातीर पुस्तक बरयलां, ते युडेमी माचयेर उपलब्ध आसा आनी तें तुमी पळोवं शकतात. www.udemy. com/course/gratitude-and-happiness-for-5-12-year-kids. ताचें भुरग्यालें पुस्तक काणयांनी भरिल्लें आसा, जें तुमी भुरग्यां खातीर वापरूं शकतात. तें शिक्षक लेगीत वापरूंक शकतात. एमेझॉनचेर तें मेळटा. https://amzn.in/d/0eoipOm0. स्वतः दोतोर ज्योतीबायक जायते पुरस्कार फावो जाल्यात.
स्वतः आयुर्वेदिक दोतोर आशिल्य्या कारणान ती उपस्थितांक भलायकेच्यो गजाली सांगुंक शकता. अशी जायतीं कामां तिणें फुकट केल्यांत. फक्त शिक्षणाचेर मोग आसा म्हूण. भुरग्यां खातीर कितेंतरी करपाचें तिच्या मनान आसलें. तांचे खातीर प्रोत्साहन दिवपी पुस्तकूय तिणें बरयलें. हातूंत तिणें सोंपी उतरावळ, काणयो हांचो आदार घेतलो. भुरग्यांचो आत्मविस्वास, खोस म्हत्वाची. तांणी टूल कीट आसपी वर्क बूकय तयार केला. जो विद्यार्थ्यांक पिरायेच्या 21 व्या वर्सां मेरेन उपेगी पडूं शकता. पळोवपाक गेल्यार ती दोतोर म्हूण आपल्या क्लिनिकांत बसून दुयेंतीं वांगडा वेळ पासार करपाक शकतात. पूण समाजीक बांदिलकी, दुसऱ्याक कितें तरी मत करप हो विचार तिका अस्वस्थ करता म्हूण दोतोरकेच्या गिन्यानाोच लाव सगल्यांक मेळचो म्हण ती कर्मचाऱ्यांच्या व्हड गटाक मजत करता. तिची हांसत खेळत संवाद सादपाची कला आयकुप्यांक आवडटा. तिचो घरकार अमेय तिका मजत करता. व्हड- व्हड कंपनीं तिचो संवाद आपल्या कर्मचाऱ्यां कडेन घडोवन हाडटा. गोंयांत आसूं वा गोंया भायर, ती आपोवणे घेता. चलयांनी मागीर तीं नोकरी करपी आसूं वा खंयच्याय वेवसायांत आसूं. तांणी संवाद कुशळटाय फाटो आपणावचो. तातूंत येवप्यांक स्मरणशक्त जाय, खेरीज समयसुचकताय जाय. तशेंच घडयाळा कडेन पळोवन काम करपाची संवय आसपाक जायना. मुख्य म्हणल्यार भाशेचेर शेक जाय.
अर्थसंकल्प, गोरवांचें हाॅस्पिटल
देशाच्या अर्थमंत्री निर्मलाबाय सीतारामन हांणी अंदुंच्या वर्साचो अर्थसंकल्प लोकसभेंत मांडलो. फाटोफाट सातवे खेपे. असो विक्रम हाचे पयलीं पी. चिदम्बरम, प्रणब मुखर्जी, मुरारजी देसाय, सी डी देशमुख हांणी केला. ह्या अर्थसंकल्पांत रोजगाराचेर, कुशळटाय विकासाचेर चड भर दिला. तशेंच उत्पादन मळा वयलो रोजगार वाडोवपाचें थारायलां. प्रॉव्हिडन्ट फंडात पयले खेप नांव नोंदोवपी कर्मचाऱ्यांक तीन हप्त्यांनी १५ हजार रुपया मेळपाची तरतूद आसा. हाचो लाव जायत्या तरणाट्यांक जातलो, हातून दुबाव ना.
विद्यार्थ्यां खातीर शिक्षण मळाचेर खूब सवलती दिल्यात. हालींच टपाल खात्यान 76 ग्रामीण टपाल सेवकां खातीर अर्ज मागयल्यात. diapostgdsonline.gov.in हे वेबसायटीचेर तुमकां चड म्हायती मेळुं शकता. तुमच्या वाठारांतल्या पंचायत, देवस्थानचे अध्यक्ष तशेंच चर्चीचे मुखेली हांकां तशी म्हायती दिल्या. ते तुमकां म्हायती दिवंक शकतात. हालींच आमच्या मुख्यमंत्र्यांनी गोरवांचें एक हॉस्पिटल सुरु करपाची घोषणा केल्या. हें गोंया भायर वचून गोरवां विशीचें शिक्षण घेवपी विद्यार्थ्यांक उपेगी पडटलें. आयज मेरेन चडशे विद्यार्थी गोंयां भायर वचून हें शिकप करताले. आयटीआय भितर परदेशी भास शिकपाची सुविधा निर्माण करपाची घोशणा जाले उपरांत आतां हातून लॉजिस्टिक्स असिस्टंट आनी सोलर पायलट हे विशय शिकोवपाचो निर्णय घेतला, हाचोय लाव विद्यार्थ्यांक जरूर जातलो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
