भांगरभूंय | प्रतिनिधी
नवी दिल्ली, खबरां संस्था: झारखंडाचे राज्यपाल सी. पी. राधाकृष्णन आतां महाराष्ट्राचे राज्यपाल जातले. राष्ट्रपती द्रौपदी मुर्मू हांणी ही म्हायती दिल्या. आतां रमेश बैस हांची सुवात राधाकृष्णन घेतले. बैस हांची १८ फेब्रुवारी २०२३ दिसा महाराष्ट्राचे राज्यपाल म्हणून नेमणूक जाल्ली. आतां सी. पी. राधाकृष्णन हांची ह्या पदाचेर नेमणूक जाल्या.
मजगतीं, महाराष्ट्र विधानसभेचे आदले अध्यक्ष आनी भाजपाचे वरिश्ठ फुडारी हरिभाऊ बागडे हांची राजस्थानाचे राज्यपाल म्हणून नेमणूक जाल्या.
मजगतीं झारखंडांत सी. पी. राधाकृष्णन हांच्या जाग्यार भाजपाचे वरिश्ठ फुडारी संतोष कुमार गंगवार हांची राज्यपाल म्हणून नेमणूक जाल्या. राष्ट्रपती भवनान शेनवारा रातीं जायत्या राज्यांनी राज्यपालांची नेमणूक केल्ल्याची घोशणा केली.
कांय म्हयन्यां उपरांत महाराष्ट्राची विधानसभा वेंचणूक जातली. हाचे आदीं राष्ट्रपती हांणी राज्याक नवे राज्यपाल दिल्यात. राधाकृष्णन खूब वर्सां भाजपाचे सक्रीय वांगडी आसात. तमिळनाडूच्या कोईंबत्तूर लोकसभा मतदारसंघाचे ते दोन कार्यकाळ संसदेचे वांगडी आसले. तशेंच कांय वर्सां तमिळनाडू भाजपाचे प्रदेश अध्यक्ष म्हणून तांणी काम पळयलां. २०१४ आनी २०१९ वर्साचे वेंचणुकेंत भाजपान तांकां लोकसभेची तिकीट दिली. मात देशांत मोदीची ल्हार आसून लेगीत ते हारले. १८ फेब्रुवारी २०२३ दिसा राष्ट्रपती हांणी झारखंडाचे राज्यपाल म्हणून तांची नेमणूक केल्ली.
जायत्या राज्यांक नवे राज्यपाल मेळ्ळे
सिक्कीमचे राज्यपाल लक्ष्मण प्रसाद आचार्य हांची आसाम आनी मणिपूरच्या राज्यपाल पदार नियुक्ती केल्या. जाल्यार जिष्णू देव वर्मा हे तेलंगणाचे राज्यपाल आसतले. प्रकाश माथूर हांचे कडेन सिक्कीमची जापसालदारकी दिल्या. गुलाब चंद कटारिया हांची पंजाबच्या राज्यपाल पदार निवड केल्या. जाल्यार रमेन डेका हांचे कडेन छत्तीसगड राज्याची जापसालदारकी दिल्या. सी. एच. विजयशंकर मेघालयचे राज्यपाल आनी के. कैलाशनाथ पुद्दुच्चेरीचे उपराज्यपाल आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
