हुंवार आनी सांवार

भांगरभूंय | प्रतिनिधी

गोंयांत पडपी पावसाक शेंकडो (इंचाचो) हुंपूंक कमीत कमी ऑगस्ट म्हयनो लागसर वाट पळोवची पडटा. हरशीं, सप्टेंबर म्हयनो मेरेन पावस शेंकड्यांचेर पावता. फाटल्या वर्सांच्या पावसाच्या शेंकड्यांचो हिशोब पळयत तर ह्या आदीं ताणें जुलय म्हयन्यात “शंभरी” हुंपिल्ली याद जायना. ह्या वर्साचो पावसाचो सांवार जर पळयत, तर तो “डबल सेन्चुरी” मारले उपरांतूच आउट जावपाच्या तयारेंत आसा अशें दिसता. आदीं लेगीत असो घोग्यांनी पावस झडटालो. गांवागांवांनी व्हाळ, न्हंयो उपाट भरून दोंगरांनी, दोंगुल्ल्यांनी मोसमी घसघशे व्हांवप, थंयच्या न्हंयांनी हुंवार येवप, हातूंत कसलीच नविदाद नाशिल्ली. सैमाची ही सगळीं कर्तूबां त्या वेळार सगळ्यांनी दोळे भरून अणभवल्यांत. कसल्याच आडमेळीच्या वा “स्मार्ट” गजालींचो उपेग करी नासतना, त्या सैमीक खेळांची फोटो कॉपी आयज लेगीत तश्याची तशी तांच्या मनांत आनी काळजांत घोळटा. ह्या सगळ्याची तांणी त्या वेळार मोकळ्या मनान मजा घेतल्या. मजा घेतना कोणें थंयसरल्या सैमीक संसाधनांक कसलेच घावे घातले नात. आयज ह्यो सगळ्यो गजाली उक्त्या दोळ्यांनी अणभवप जायना. आपणाल्या अणभवाचें “रील” करून तें सोशल मिडियाचेर अपलोड करून सैमीक प्रेम सार्वजनीक प्रकट केले बगर पुराय जायना आनी अशें करपी हे सार्वजनिक मोगी फाटल्यान त्या सुंदर जाग्यांनी कोयर करून परततात. हें सगळें पळोवन वायट दिसता. सहज सुंदर फोटोग्राफी करपी म्हजो आमीग सदांच सांगी की ताणें आपल्या जिणेंत सैमीक रंग आनी ओडलायणें खीण केन्नाच उक्त्या दोळ्यांनी नियाळूंक ना. ताणें खंय तें फकत ताच्या निर्जीव कॅमेराच्या लेन्सींतल्यान वेंचले.
आयज मेरेन गांवांनी शिक्षण, भलायकी आनी अश्यो जायत्यो हेर गजाली जाय त्या प्रमाणें विकसीत जावंक ना. थंयसरले लोक गांव सोडून शारांत थळांतरीत जावंक लागले. थळांतर केल्ल्या ह्या लोकांच्या पासत व्हड बिल्डिगीं तयार जावंक लागल्यो. उपरांत तांच्या बांदावळीक थळावे कामगार कमी पडूंक लागले. ह्या कामा पासत भायर सावन मजूर आयले. तांच्या कडसून सरकारी जाग्याच्या अतिक्रमणाचो सांवार सुरू जालो. जागो फुकट मेळिल्ल्यान गोंय भायल्यान येवपी ह्या लोकांनी गोंया वाटेच्यान प्रस्थान सुरू केलें. आझाद नगरी, बाबा नगरी, आई कृपा, साई नगर असल्या नांवांच्या नगरांचें शारांनी हुंवार आयले. एकगठ्ठो मतां मेळोवंक झोपडपट्टीं नगरीक राजकी आलशिरो मेळूंक लागलो. मजगतीं, अंदूंच्या पावसान घुमशेणां घालीं. शारांतल्या रस्त्यांनी उपाट भरिल्लें उदक घरा, दुकानांनी झिरपलें. शारांतल्या झाडा पेडा वांगडा मातयेचीं घरां, पत्र्यांच्यो खोंपीं हांची पडझड सुरू जाली. पावसाळी अधिवेशन सत्र चालू आशिल्ल्यान थंयसर प्रस्नांचो पावस सुरू जालो. घरां, खोंपी परत बांदून दिवंक समाजकारणी आनी राजकारण्या मदीं चडाओड सुरू जाली. काय जाग्यांनी उस्तूरें वचसर मजत पावली. शेवटाक फायदो कोणांक जालो आनी लुकसाण कोणाचें जालें हें कळूंक मार्ग ना. मात दिसाळ्यांनी, समाज माध्यमांचेर दात्याच्या दान दितनाच्या आनी अडिल्ल्याचें तें घेतनाच्या फोटवांचो सांवार जालो.
गांवांनी येवपी न्हंयचो हुंवार मात केन्नाच कोणाचें लुकसाण करीना. घसघसून उपाट भरून व्हांवपी त्या न्हंयची सुंदर, लयबद्ध झोत लुकसाण करचे जाग्यार खुबश्या जाणांक फायद्याची थरता. दोंगरा वेल्यान व्हांवन येवपी ती न्हंय आपल्या हुंवाराच्या उदका वांगडा अटंग्यां रानांनी सभावीक परीपक्व जावन हुमटून पडिल्ली झाडां, भाटांनी सुकून पडिल्ले नाल्ल घेवन येता. ती आडावन धडयेर एकठांवन गांवांतलो कितलोसोच लोक हाचो फायदो घेता. न्हंयेच्या दोनूय कुशीच्या धडेवेली सगळी घाण हो हुंवार नितळ करता. धडेवेल्या भाटांनी सारवटांचो मोळपो येवन पडटा. आदीं मदीं चुकून केन्ना कोणांक लुकसाण जायत तर गांवचे लोक अडिल्ल्यांक मजत करूंक फाटीं रावनात.
ते खातीर ते समाजकारणी आनी राजकारण्यांचेर अवलंबून रावनात. केल्ल्या मजतीचे कसलेच फोटू काडिनात. गावचे लोक सैमाचेर आशिल्ल्या आपल्या मोगाची प्रख्याती करूंक फोटू आनी रील करीनात. हुंवारांत व्हांवन वचप्यांक हात दिवंच्या सुवातेर हातांतल्या फोनाचेर शुटींग करीनात. उटंगार पडिल्ल्या ह्या पावसान शार तशेंच गांवच्या वातावरणांत शितळकाय पातळायल्या. अशें आसून लेगीत मनीसपणाची हुनसाण मात गांवगिऱ्यांतल्या आमच्या लोकांनी तिगोवन दवरल्या. हांकां लागून एक गजाल नदरे आड करूं नज. गांवांनी कितलोय जरी पावस पडलो तरी त्या पावसान येवपी हुंवार थंयसर केन्नाच सांवार करीना.

दादा हेगडे

9518942298