भांगरभूंय | प्रतिनिधी
गोंय ते जयपूर 13 टक्क्यांनी, बेंगळुरू ते गोंय 5- 11 टक्क्यांनी वाड
नवी दिल्ली, खबरां संस्था ः देशांतलो हवाई प्रवास आनीकय म्हारग जावंक शकता. कारण बेंगळुरू, कोच्ची, अहमदाबाद सयत 16 मुखेल विमानतळांचेर वापरपी विकास शुल्क (User Development Fees) 2% वयल्यान 223% मेरेन वाडलां. पाटणा विमानतळार हें शुल्क 204 रुपया वयल्यान 660 रुपया जाल्यात. देखून विमान भाडें 456 रुपया वाडूंक शकता.
इंडियन टुरिझम असोसिएशनाची अध्यक्ष ज्योती मायल हांच्या मतान विमानतळाचे ऑपरेशन आनी देखरेखी खातीर चड उदरगत शुल्क योग्य आसा. पूण ताचो भार प्रवाशांचेर पडटा. नवे विमानतळ बांदप आनी टियर 2-3 शारां कडेन जोडणी आनी विमान सेवा वाडिल्ल्यान मागणी व्हड प्रमाणांत वाडल्या अशें विमान तज्ञ गौरांग शाह सांगतात.
सणाच्या हंगामांत भाडें अजून म्हारग जावपाची शक्यताय
० ह्या तिमाहींतलें भाडें फाटल्या वर्साच्या ह्याच काळा परस 20 टक्क्यांनी चड आसा. थॉमस कूक हांच्या मतान दिल्ली ते चंडीगड मेरेन विमान सेवा 20 टक्क्यांनी म्हारग जाल्या.
० मुंबय ते उदयपूर, गोंय आनी जयपूर मेरेन भाडें 13 टक्क्यां मेरेन वाडलां. बेंगळुरू सावन गोंय, चंडीगड, लेह आनी श्रीनगर मेरेनच्या भाड्यांत 5-11 टक्क्यांनी वाड जाल्या.
० भाडें आनीकय वाडूंक शकता. कारण स्वातंत्र्य दीस, जन्माष्टम, ओनम आनी चवथ अशो सणाचो हंगाम लागीं पावला. ह्या काळांत विमान सेवांक व्हड मागणी आसता.
आंतरराश्ट्रीय उड्डाणां सरासरी 6% सवाय, भारतांत 10%
संवसारभर प्रवाशांची मागणी वाडिल्ल्यान विमान कंपन्यो विमानांची संख्या वाडयतात. ताका लागून तिकेटांचे दर उणे जायत आसात. खास करून आशिया आनी युरोपांत हवाई प्रवास सवाय जाल्या. ऑस्ट्रेलिया ते इंडोनेशिया मेरेनचें भाडें 18 टक्क्यांनी देंवलां. ऑस्ट्रेलिया ते युरोप आनी अमेरिकेंत वचपाचें भाडें 11 टक्क्यांनी देंवलां. भारतांतय पयल्या सहामाहीत आंतरराष्ट्रीय विमान भाडें सरासरी 10 टक्क्यांनी देंवलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
