भांगरभूंय | प्रतिनिधी
भांगरभूंय । प्रतिनिधी
पणजीः गोंयांतल्या खाजगी कंपनींनी थळाव्यांक रोजगार मेळचो, हे खातीर कामगार कायद्यांत ह्याच अधिवेशनांत दुरुस्ती करतले. तातूंत गोंयांतल्यो सुवातो भरतना रोजगार विनिमय केंद्राक हाची म्हायती दिली ना जाल्यार दंडाची रकम 10 हजार ते 4 लाकां मेरेन वाडयतले, अशें मुख्यमंत्री डॉ. प्रमोद सावंत हांणी शुक्रारा विधानसभेंत उलयतना स्पश्ट केलें. हे विशीं आमदार कार्लोस फेरेरा हांणी खाजगी विधेयक मांडिल्लें.
मुख्यमंत्र्यान सांगलें, हे आदीं कामगार कायदो 1959 त 25 परस चड कामगार आशिल्ल्या खाजगी कंपनींनी रोजगार विनिमय केंद्राक भरती विशीं म्हायती दिवप गरजेचें आशिल्लें. तातूंत दुरुस्ती करून कामगार संख्या 10 मेरेन उणी केल्या. तशेंच कायद्यांतल्या कलम 5 त बदल करून रोजगार विनिमय केंद्राक खाजगी कंपनींची रोजगार भरती विशींची अतिरिक्त म्हायती घेवपाचो अधिकार दिला.
तेच प्रमाण कंपनींनी रोजगार मेळावे आयोजीत करतना वा फुडल्या स म्हयन्यांत कितल्यो रोजगार संदी आसतल्यो, सुवातेर भरती केल्ले उमेदवार, रोजगार विनिमय केंद्रांतले वळेरींतल्या उमेदवारांचे सध्याचे स्थितीची म्हायती लेगीत दिवची पडटली.
सरकाराच्या कायद्यांतल्या कलम 7 त लेगीत दुरुस्ती करपाचो विचार आसा. मात ते आदीं आमकां उद्देगांक विस्वासांत घेवप गरजेचें आसा. ते खातीर कामगार आयुक्त कार्यालया कडल्यान उद्देजकां वांगडा चर्चा चालू आसा. फुडल्या वर्सा चार नवे केंद्रीय कामगार कायदे येतले. गरज पडल्यार तातूंत गोंयाक फायद्याचे अशे बदल करतले, अशें मुख्यमंत्री डॉ. सावंत हांणी सांगलें.
मजगतीं, आमदार कार्लोस फेरेरा हांणी उद्देगांक प्लॉट दितना 50 ते 75 टक्के नोकऱ्यो थळाव्याक दिवपाची अट घालुनूच ते दिवपाची मागणी केली. गोंयांत भरती करतना थळाव्या तरणाट्यांक ते विशींची म्हायती आसप गरजेचें आसा, अशें तांणी सांगलें.
आमदार विजय सरदेसाय हांणी गोंया खातीर नवें रोजगार धोरण हाडून ते प्रमाण कायदे हाडपाची मागणी केली. तशेंच सरकारा कडेन थळाव्यांक रोजगार दिवपाची इत्साशक्त नाशिल्ल्याचो आरोप तांणी केलो. निलेश काब्राल हांणी थळाव्यांक रोजगार दिवपी कंपनींक सवलत दिवपाची मागणी केली. नलेश काब्राल हांणी थळाव्यांक रोजगार दिवपी कंपनींक सवलत दिवची, अशी मागणी केली.
रोजगार दिना जाल्यार भत्तो दियात : विरेश
थळाव्यांक न्याय दिवपा संबंदांत सरकार गंभीर ना. भाजपान वेंचणूक जाहीरनाम्यांत बेरोजगारांक 5 हजार रुपया भत्तो दिवपाचें आस्वासन दिल्लें. सध्या सरकार थळाव्यांक रोजगार दिवपाक शकना जाल्यार, हो बेरोजगारी भत्तो तरी दिवचो, अशें आमदार विरेश बोरकार हांणी मागलें.
खाजगी कंपनींनी 61,690 गोंयकार कामगारः बाबूश
गुंतवणूक उर्बा मंडळान (आयपीबी) 96 प्रकल्पांक मंजुरी दिली, पूण तातूंतल्यान गोंयांतल्या फक्त 1,511 जाणांकूच रोजगार मेळ्ळो. आतां मेरेन खाजगी कंपनींनी कितल्या गोंयकारांक नोकऱ्यो मेळ्ळ्यो, हाचो डेटा आमदार विरेश बोरकार हांणी प्रस्नजापेच्या वराक मागलो. ताचेर आधारकार्डां वयल्या नाम्या प्रमाण खाजगी कंपनींनी 61,690 गोंयकार कामगार आशिल्ल्याचें कामगार मंत्री बाबूश मोन्सेरात हांणी स्पश्ट केलें. फुडल्या तीन म्हयन्यांत हे विशींचो सविस्तर डेटा जाहीर करतले, अशेंय तांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
