भांगरभूंय | प्रतिनिधी
सरकारा कडल्यान 35 कोटींची तजवीज
भांगरभूंय । प्रतिनिधी
पणजी : सोलर रूफ टॉप (5 किलोवॅट) बसोवन 400 युनिटां मेरेन फुकट वीज दिवपाची तजवीज आशिल्ली गोंय विनामुल्य वीज येवजणेचो सरकारान शुभारंभ केलो. गोंय सरकार हे येवजणेचेर 35 कोटी रुपया खर्च करतलें, अशें मुख्यमंत्री डॉ. प्रमोद सावंत हांणी सांगलें.
केंद्र सरकाराच्या प्रधानमंत्री ‘सूर्य घर मुफ्त बिजली’ येवजणे खाला गोंय सरकारान गोंय विनामुल्य वीज येवजण सुरू केल्या. सोलर रूफ टॉपांचो आकडो वाडोवन घराक लागपी वीज तयार जावची, हो हेतू हे येवजणे फाटल्यान आसा. 5 किलोवॅट मेरेन आनी 400 युनिटा परस उणी वीज वापरपी गिरायकांक सोलर रूफ टॉप फुकट मेळटलो. गोंय उर्जा उदरगत प्राधिकरण (गेडा) सगळो खर्च करतलें, अशें मुख्यमंत्री डॉ. प्रमोद सावंत हांणी सांगलें.
कार्यावळीक सभापती रमेश तवडकार, वीजमंत्री सुदिन ढवळीकार, आमदार डॉ. चंद्रकांत शेट्ये, मुखेल वीज अभियंते स्टीफन फर्नांडीस हाजीर आशिल्ले. कार्यावळींत लाबार्थ्यांक अनुदानाचें वांटप जालें. येवजणेची कार्यवाही 2026 – 27 मेरेन पुराय जातली. येवजणे खातीर 75,021 कोटींची केंद्रीय अर्थसंकल्पांत तजवीज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
