भांगरभूंय | प्रतिनिधी
– आयज भाजपशासीत मुख्यमंत्र्यांची, फाल्यां निती अायोगाची बसकापणजी : भाजपशासीत राज्यांच्या मुख्यमंत्र्यांच्या तशेंच निती आयोगाचे बसके खातीर मुख्यमंत्री डॉ. प्रमोद सावंत शेनवारा सकाळीं दिल्ली वतले. भाजपशासीत मुख्यमंत्री, उपमुख्यमंत्री तशेंच प्रदेशाध्यक्षांची बसका शेनवारा, जाल्यार निती आयोगाची बसका आयतारा जातली.
फुडल्या कांय म्हयन्यांत विवीध राज्यांनी विधानसभेच्यो वेंचणुको जावपाच्यो आसात. तशेंच पक्षांतूय व्हड बदल जातले. हे विशीं चर्चा करपाक भाजपाध्यक्ष जे. पी. नड्डा हांणी भाजपशासीत राज्यांच्या मुख्यमंत्र्यां सयत उपमुख्यमंत्री आनी प्रदेशाध्यक्षांकूय दिल्लींत आपयल्या. प्रधानमंत्री नरेंद्र मोदी बसकेक हजर रावन मुख्यमंत्री, उपमुख्यमंत्री आनी प्रदेशाध्यक्षांक संबोधीत करपाची शक्यताय आसा. कांय म्हयन्यां पयलीं जाल्ले लोकसभा वेंचणुकेंत भाजपाक कांय राज्यांतल्यो सुवातो मेळोवप जमले ना. तातूंतल्या कांय राज्यांनी फुडल्या दोन वर्सांत विधानसभा वेंचणुको जातल्यो. ताका लागून ताची तयारी भाजपान आतां पसुनूच सुरू केल्या.
दुसरे वटेन पक्षां मदीं राष्ट्रीय पांवड्या वयल्यान अंतर्गत बदल जातले. ते विशीं नड्डा सगल्याच राज्यांच्या प्रदेशाध्यक्षां कडेन चर्चा करतले.
मजगतीं, निती आयोगाचीय म्हत्वाची बसका आयतारा दिल्लींत जातली. मुख्यमंत्री डॉ. प्रमोद सावंत बसकेक हजर रावन गोंयचे प्रस्न मांडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
