भांगरभूंय | प्रतिनिधी
भारतीयां खातीर गुगला कडल्यान एक गुड न्यूज आसा. फाटल्या जायत्या वर्सां सावन भारतियां कडल्यान जावपी एक मागणी निमाणी गुगलान मान्य केल्या. आतां बेगीनूच हे विशीं अपडेट जारी करतले. ही मागणी म्हळ्यार गुगल मॅप वापरतना आतां उड्डाण पूल आयल्यार ताचो वापर करपाचो काय ना हेंय मॅपांत आतां दाखयतलें. फाटल्या कांय वर्सां सावन सेगीत युजर्सां कडल्यान आनी खासा करून भारतीय युजर्स कडल्यान हें असलें फिचर गुगल मॅप्सांत आसचें अशी मागणी करताले. निमाणी ती मागणी ह्याच सप्तकांत पुराय जातली.
गुगल हाडटलें ६ नवे फिचर्स
भारतीय युझर्सां खातीर गुगल मॅप्सांत ६ नवे फिचर्स जारी करतलें. हातूंत भारतीयां कडल्यान परत परत मागणी करपी एका म्हत्वाच्या पर्यायाचोय आसपाव आसा. आतां गुगल मॅपांत मुखार उड्डाण पूल वापरपाचो काय ना हेंय सांगतले. तशेंच आतां गुगल मॅपांत इलेक्ट्रीक वाहनां खातीरचें विशेश फिचरूय येतलें. सद्दं गुगल मॅप वापरप्यांचो विचार करूनय कांय खास फिचर्सांचो आसपाव करतले. गुगल आतां एआयच्या मदतीन कांय खास फिचर्सांचो गुगल मॅपांत आसपाव करून घेतलें. मात ताचे पयलीं फाटल्या कितल्याशाच वर्सां सावन भारतीयां वतीन जावपी उड्डाण पुलाची मागणी पुराय जातली.
हें फिचर कशें काम करतलें?
गुगला कडल्यान दिवपी हें अपडेट पयलीं अँड्रॉयड युजर्सां खातीर उपलब्ध जातलें. ह्या फिचराचें नांव टेक फ्लायओव्हर अशें आसा. म्हळ्यार उड्डाणपुला लागसार पावले उपरांत गुगल मॅपांतल्या ऑटोमेटेड व्हॉयस मुखारचो उड्डाणपूल वापरपाचो काय ना हें सांगतलें. ताका लागून प्रवास आनीक बरो आनी सुखाचो जातलो. सध्या हें फिचर सुरवातेच्या टप्प्यांत ४० शारांनी काम करतले. आदीं हे २ डब्यू आनी ४ डब्ल्यू मॅप्स प्रकारांत लॉन्च करतले. आयफोनावेले आयओएस खातीरचे अपडेट उसरां येतले.
इलेक्ट्रीक वाहनां खातीर कितें फिचर्स?
इलेक्ट्रीक वाहनांक भारतात बरी मागणी आसा. दुचाकी आसूं वा चारचाकी भारतीयांचो इलेक्ट्रीक वाहनांचो वापर वाडला. नव्या फिचराक लागून देशांतल्या ८ हजारां परस चड चार्जिंग स्टेशनां खंय आसात हें गुगल मॅपांत दाखयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
