भांगरभूंय | प्रतिनिधी
गुडगांव, खबरां संस्था: गुडगांवांत ५ वर्सां पिरायेच्या भुरग्याक सोसायटीच्या स्विमींग पुलांत बुडून मरण आयलें. गुडगांवच्या सेक्टर ३७ डी हांगाच्या बीपीटीपी पार्क सरीन सोसायटींत ही घडणूक घडली. ह्या सोसायटी वेवस्थापन आनी लायफ गार्डाच्या निश्काळजीपणाक लागून ही घडणूक घडिल्ल्याचो आरोप आसा.
सोसायटी आरडब्ल्यूएचे अध्यक्ष आनी सोसायटींत रावप्यांच्या म्हणण्या प्रमाण, बिन्नी सिंग हांचो ५ वर्सां पिरायेचो चलो मिवंश हो सनसिटी स्कुलांत शिकतालो. बुधवारा सांजवेळार मिवंश आजी रमा सिंग हिचे वांगडा सोसायटीच्या स्विमींगपुलांत न्हांवपाक गेल्लो. थंय भुरग्यां खातीर तयार केल्ल्या ल्हान स्विमिंग पुलांत तो न्हातालो. तेन्ना रमा सिंग मिवंशा खातीर कांय वस्तू विकत्यो घेवपा खातीर दुसरे कडेन गेली. तिणें लाइफ गार्ड आनी सुरक्षा रक्षकाक मिवंश हाचेर लक्ष दवरपाक सांगलें. मात लायफ गार्ड आनी सुरक्षा रक्षकांनी ताचे कडेन आडनदर केली. मिवंश सुमार ४ फूट उदकांत गेलो आनी थंय ताका बुडून मरण आयलें. तरीय त्या सुरक्षा रक्षकान आनी गार्डान ताचे कडेन पळोवंक ना. उपरांत मिवंशाची कूड उदका वयर हुबतना हेर कांय भुरग्यांनी पळयली तेन्ना ही घडणूक उक्ताडार आयली. १० मिनटां ह्या भुरग्याची कूड उदका वयर हुबताली.
मजगतीं, मिवंशाची कूड भायर काडून हॉस्पिटलांत दाखल केली तेन्ना डॉक्टरांनी ताका मरण आयिल्ल्याचें सांगलें. उपरांत हे सोसायटींत रावपी लोकांनी बिल्डराच्या मेंटेनन्स एजन्सीच्या आनी गार्डच्या निश्काळजीपणाक लागून ही घडणूक घडिल्ल्याचो आरोप केला. हे विशीं संबंदीतांचेर गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
