फिल्मी खबरो

भांगरभूंय | प्रतिनिधी

‘जवान’ फिल्माक फाटी घालूंक ‘कल्की’क अपेस

‘कल्की 2898 एडी’ फिल्म प्रदर्शीत जावन म्हयनो जायत आयलो. फिल्माचे बजेट 600 कोटी मायज आसा. तशेंच देशभर वेगवेगळ्या भाशेंत हें फिल्म प्रदर्शीत जालां. बॉलीवूडांत हें फिल्म धुमाकूळ घालतलें, सगळे विक्रम मोडटले अशें दिशिल्लें. मात, तशें जावंक ना. इतलेंच न्हंय तर भारतांत सगल्यांत चड पयशें जोडपी ‘जवान’ फिल्माक लेगीत फाटी घालपाक कल्कीक अपेस आयलां. जवान फिल्मान भारतांत 640 कोटी जोडिल्लें. जाल्यार वेगवेगळ्या भाशेंत प्रदर्शीत जाल्ल्या कल्कीन आतांमेरेन 622 कोटी जोडल्यात. तशेंच ह्या फिल्माची दिसपट्टी जोड कोटींच्या घरांत देंवल्यां. तेन्ना हे फिल्म जवान फिल्माचो विक्रम मोडपाक शकनां हें स्पश्ट जाला. कल्कीन बॉलीवूडांत 278 रुपयांची जोड केल्या. हेर भाशांनी ह्या फिल्माक भारतांत 344 कोटी रुपया मेळ्ळ्यांत संवसारीक पांवड्यार ह्या फिल्मान 1100 कोटींचो पांवडो हुंपला.

‘बॅड न्यूज’ फिल्माक बॅड न्यूज

‘गुड न्यूज’ चल्लो म्हूण त्या नांवांचो आधार घेवन काडिल्लें ‘बॅड न्यूज’ फिल्म फ्लॉप थारलें. ह्या फिल्मान पयल्या सप्तकांत 35 कोटी रुपया वाशील केल्यात. हें फिल्म 80 कोटी रुपयांत तयार जाल्लें. अॅनिमल फिल्माक लागून लायमलायटांत आयिल्लें त्रिप्ती दिमरी, विकी कौशल आनी सान्या मल्होत्रा अभिनीत बॅड न्यूजाक आनीक बॅड न्यूज म्हणल्यार ह्या शुक्रारा नव्या फिल्मांचो पावस पडटा. तेन्ना लुकसाण चड जातलें हें निश्चीत आसा.

‘द यूपी फायल्स’ आयज थेटरांत

खऱ्या घडणुकांचेर आधारीत ‘द यूपी फायल्स’ फिल्म आयज प्रदर्शीत जाता. हें फिल्म कांय थेटरांनीच येतलें, मात ह्या फिल्मांविशीं लोकांमदीं उमळशीक आशिल्ल्यान बरें चलपाक शकता. ह्या फिल्मांत मनोज जोशी मुखेल भूमिकेंत आसा. जाल्यार मंजरी फडणीस, अली असगर, अशोक समर्थ, मिलिंद गुणाजी, शाहबाज खान, अमन वर्मा हांच्योय म्हत्वाच्यो भूमिका आसात.

आयज दक्षीणात्य फिल्मांचो पावस

आयज दक्षीणात्य फिल्मांचो पावस पडटलो. तेलगू फिल्म गल्ली गॅंग्स, ऑपरेशन रावण, पुरुषोथोमोडू, मल्याळम फिल्म सिक्रेट, पंचायत जेट्टी, लेव्हल क्रॉस, तामिळ फिल्म पिठा 23:23, मुदल कादल मर्यादाह प्रदर्शीत जाता. ही सगलीं फिल्मां वेगवेगळ्या विशयांचेर आसात. ह्या फिल्मांनी दक्षीणेंतली चडशी थेटरां घेतल्यात, ताका लागून कल्की फिल्माचें खेळ उणें जातले.