भांगरभूंय | प्रतिनिधी
भारतान पॅरीस ऑलिम्पिकांत आपल्या अभियानाची सुरवात उत्कृश्ट रितीन केली. काल तिरंदाजीचे पात्रताय फेरयेंत भारताच्या दोनूय पंगडांनी पयल्या चारांनी सुवात मेळयत थेट क्वॉर्टरफायनलींत सुवात मेळयली.
अंकिता भकत, भजन कौर आनी दिपिका कुमारी हांचो आस्पाव आशिल्ल्या भारताच्या बायलांच्या पंगडान थेट क्वॉर्टरफायनलींत सुवात मेळयल्या उपरांत दादल्यांच्या पंगडान निमाण्या आठांतली आपली सुवात निश्चीत केली.
दादल्यांच्या पंगडांत तरुणदीप राय, प्रवीण जाधव आनी धीरज बोम्मादेवरा हांचो आस्पाव आसा. तरुणदीप चवथे खेपे ऑलिम्पिकांत खेळटा, जाल्यार प्रवीम दुसरे खेपे वांटो घेता. धीरजाची ही पयलीच ऑलिम्पीक खेळां सर्त आसा.
ह्या तिगांनी पात्रताय फेरयेच्या पयल्या टप्प्यांत तोखणाय करपा सारखी कामगिरी करतना सवे सुवातेर पकड घटमूट केल्ली.
तरुणदीपान 337 गुणां सयत 14वे सुवातेर आशिल्लो. जाल्यार प्रवीण (328) आनी धीरज (335) हे वळेरेन 24वे आनी 37वे सुवातेर आशिल्लो. दक्षीण कोरियाचो शेक हांगाय पळोवपाक मेळ्ळो. तांणी 1032 गुणां सयत सांघीक गटांतली पयली सुवात मेळयली. भारत पयल्या टप्प्यांत 1000 गुणां सयत सवे सुवातेर आशिल्लो.
दुसऱ्या टप्प्यांत भारताच्या खेळगड्यांनी जबरदस्त कमबॅक केलें आनी 2013 गुणां सयत सांघीक गटांत तिसऱ्या क्रमांकाची सुवात निश्चीत केली. ह्या नेटार तांणी थेट क्वॉर्टरफायनलींत सुवात मेळयली आनी म्हत्वाचें म्हणल्यार सेमी फायनली खातीर बळिश्ट दक्षीण कोरियाचें आव्हान चुकयलें. कोरियान 2049 गुणां सयत पयली सुवात मेळयली. फ्रान्सान 2025 गुणां सयत दुसरी सुवात मेळयली.
भारता वतीन धीरजान सगल्यांत चड 681 गूण मेळयत चवथी सुवात निश्चीत केली. तरुणदीपान 674 आनी प्रवीणान 658 गुणां सयत वळेरेन 14वी आनी 39वी सुवात मेळयली.
बायलांच्या गटांत अंकिता भकताच्या फुडारणाखाला खेळपी भारतान 1983 गूण मेळयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
