भांगरभूंय | प्रतिनिधी
येरादारी मंत्र्यां कडल्यान गोवा मायल्स अॅपाक तेंकोपणजी : गोवा मायल्स टॅक्सी अॅप सेवेचेर उपाय काडपा खातीर सरकार आमदारां सयत टॅक्सीकारां कडेन चर्चा करतले. अधिवेशन सोंपचे पयलीं टॅक्सीकारांच्या प्रस्नाचेर उपाय काडपाचे सरकाराचे यत्न आसात, अशें मुख्यमंत्री डॉ. प्रमोद सावंत हांणी सांगलें.
टॅक्सी सेवेंत शिस्त हाडपा खातीर अॅप सेवा गरजेची आसा, अशें सांगून येरादारी मंत्र्यांनी गोवा मायल्स अॅपाक तेंको दिलो. पुराय संवसारांत अॅप आसतना गोंय फांटी रावंक शकना. टॅक्सीकारांक स्वतंत्र अॅप करपाची मेकळीक आसा, अशें येरादारी मंत्री मॉवीन गुदिन्हो हांणी सांगलें. फुडल्या 9 म्हयन्यांत पंचायतीच्यो 20 सेवा ऑनलायन मेळपाक सुरवात जातली, अशेंय तांणी सांगलें.
येरादारी, पंचायत आनी उद्देग खात्याच्या चर्चेक जाप दितना मंत्र्यांनी ही म्हायती दिली.
गोेवा मायल्स अॅप सेवेचे दर 20 टक्के उणे आसात. पुराय संवसारांत आतां टॅक्सी अॅप सेवा सुरू आसा. ही अॅप सेवा सर्गेस्त मनोहर पर्रीकार हांणी राज्यांत सुरू केल्ली.
राज्यांत 18 हजार टॅक्सी आशिल्ल्याचे गृहीत धरले जाल्यार उण्यांत उणे 10 हजार कोटींचो टॅक्सी वेवसाय आसा. टॅक्सी वेवसायांत शिस्त येवपा खातीर अॅपाची गरज आसा. हाचेर उपाय काडपा खातीर मुख्यमंत्र्यां सयत आमदारांची बसका घेवपाची तयारी आसा.
गोंयच्या टॅक्सीकारां खातीर टॅक्सी ’पात्रांव’ येवजण सुरू केल्या. हाचे 90 टक्के लाबार्थी गोंयकार आसात. टॅक्सीकारांक बॅच बंधनकारक आसा.
—————-
राज्यांत बशींचो उणाव
कदंबा म्हामंडळा कडेन 541 बशी आसात. गांवगिर्या वाठारांत 329, शारी वाठारांत 100 बशी आसात. इलेक्ट्रीक बशी 64 जाल्यार पणजी स्मार्ट सीटी कडेन 48 बशी आसात. आनीक 86 बशी येवपाच्यो आसात. तशेंच सीएसआर कार्यावळी खाला आयआयटी अॅल्युमिनी कडल्यान 500 बशी गोंयांक मेळटल्यो. हाचे उपरांत बशींचो उणाव पयस जातलो.
सरकार हाचे फुडें रेन्ट अ कार आनी रेन्ट अ बायकाक आनीक परवाने दिवचे ना, अशें येरादारी मंत्री मॉवीन गुदिन्हो हांणी सांगलें.
उद्देगांनी गोंयकारां खातीर नोकर्यो मेळच्यो म्हूण सरकार आरक्षण लागू करपाक शकना, अशें आरक्षण घटनेच्या विरोधांत आसा. कर्नाटकांत नोकर्यो राखीव करपाचे तजवीज आशिल्ले विधेयक स्थगीत दवरचे पडले. तरी लेगीत गोंयकारांक नोकर्यो मेळच्यो अशी वेवस्था सरकार करतले, अशें आस्वासन उद्देग मंत्री मॉवीन गुदिन्हो हांणी दिलें.
फुडल्या 9 म्हयन्यांत पंचायतींच्यो 20 सेवा ऑनलायन जातल्यो. तशेंच फुडल्या 6 म्हयन्यांत पंचायत कर्मचार्यां खातीर बायोमेट्रिक्स कार्डाच्या आदारान हजेरीची नोंद जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
