भांगरभूंय | प्रतिनिधी
भांगरभूंय । प्रतिनिधी
पणजीः संवसारीक मळा वयल्या अॅरलायन कंपनींचीं विमानां दाबोळी वयल्यान मोपा विमानतळाचेर स्थलांतरीत जावपाक लागिल्ल्यान दाबोळीच्या अस्तित्वा विशीं परतून हुस्को निर्माण जाला. दाबोळी विमानतळ बंद जावपाचीं चिन्नां दिसपाक लागल्यांत, असो हुस्को आमदारांनी उक्तायलो.
बिरेस्तारा सभाघरांत शिक्षण खात्या सयत खण तशेंच हवाई येरादारी खात्याच्या मागण्यांचेर चर्चा जाली.
दाबोळी विमानतळाचेर येवपी विदेशी विमानां आतां मोपाचेर स्थलांतरीत जावपाक लागल्यांत. दाबोळी विमानतळ देशी विमानतळ उरतलो काय तो बंद जातलो? असो दुबाव आमदार मायकल लोबो हांणी उक्तायलो. अॅरलायन कंपनीं कडेन उलोवन दाबोळी विमानतळा खातीर सरकारान हस्तक्षेप करपाची गरज आसा.
आमदार आलेक्स रेजिनाल्ड हांणी लेगीत दाबोळी विमानतळा विशीं दुबाव उक्तायलो. खूबशीं सरकारा आयलीं आनी गेलीं, दाबोळी कडेन मात लक्ष दिलें ना, असो आरोप तांणी केलो. टॅक्सीकार, हॉटेल वेवसाया खातीर दाबोळी विमानतळ उरपाची गरज आसा, अशी मागणी तांणी केली.
दाबोळी विमानतळाचेर देशी आनी विदेशी विमानां सेगीत येतलीं, अशी वेवस्था सरकारान करपाक जाय. सरकारान हस्तक्षेप करपाची गरज आसा, अशी मागणी आमदार निलेश काब्राल हांणी केली.
मोपा विमानतळाक मान्यताय मेळिल्ली तेन्ना दाबोळी विमानतळ उरतलो, अशें आस्वासन केंद्र सरकारान दिल्लें. आतां सगळ्या अॅरलायन कंपनींचीं विमानां मोपाचेर स्थलांतरीत जावपाक लागल्यांत. सरकारान अॅरलायन कंपनीं कडेन चर्चा करून उपाय काडपाची मागणी आमदार दिगंबर कामत हांणी केली. दाबोळी विमानतळाचेर आतां अॅरो ब्रिजाच्या विस्ताराचें काम सुरू आसा. हें काम सुरू आशिल्ल्यान दाबोळी विमानतळ बंद पडत, अशें आपल्याक तरी दिसना, अशें दिगंबर कामत हांणी सांगलें.
दाबोळी विमानतळाक मोपा विमानतळा कडेन सर्त करची पडटा. हाका लागून दाबोळी विमानतळाचेर येवपी विमानां खातीर सरकारान सवलती दिवपाची गरज आसा. मोपा परस दाबोळीची विमान सेवा सवाय जातली, हाचे कडेन लक्ष दिवपाक जाय, अशें विजय सरदेसाय हांणी सांगलें. दाबोळी विमानतळाचें अस्तित्व आतां जीएमआर कंपनीचेर निंबून आसा, अशें मत विरोधी पक्ष फुडारी युरी आलेमांव हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
