भांगरभूंय | प्रतिनिधी
ऑक्टोबराच्यान डम्प म्हालाची जातली पावणी
– दाबोळी विमानतळ बंद जावचो ना
– अंदूंच्यान रेंव काडपाचे परवाने
– म्युझियम इमारत पोरणे गोंयां
– विद्यापीठ कॅम्पसांत फार्मसी, वास्तुशिल्पकला म्हाविद्यालय
भांगरभूंय । प्रतिनिधी
पणजी : पुडल्या 15 दिसांत आनीक 3 खण ब्लॉकांची पावणी जातली. 9 ब्लॉकांची पावणी जावन एका ब्लॉकाचेर खण वेवसाय सुरू जाला. डम्प म्हालाची पावणी ऑक्टोबराच्यान सुरू जावपा सयत पुराय तरेन खण वेवसाय सुरू जातलो, अशें मुख्यमंत्री डॉ. प्रमोद सावंत हांणी सांगलें.
शिक्षण, खण, हवाई येरादारी ह्या खात्यांच्या मागण्यांचेर चर्चा जावन सभाघरान तांकां मान्यताय दिली. चर्चेक जाप दितना मुख्यमंत्री डॉ. प्रमोद सावंत हांणी ही म्हायती दिली.
दक्षीण गोंयांत 2 जाल्यार उत्तर गोंयांत 1 अशा 3 खण ब्लॉकांची पावणी 15 दिसांत जातली. सरकाराच्या डम्प धोरणा प्रमाण ऑक्टोबराच्यान डम्प म्हालाची पावणी जातली. हाका लागून पुराय तरेन खण वेवसाय सुरू जातलो. रेंवेचो उणाव पयस करपा खातीर अंदूंच्यान रेंव काडपाचे परवाने दिवपाक सुरवात जातली, अशें मुख्यमंत्री डॉ. सावंत हांणी स्पश्ट केलें.
मोपा विमानतळाचेर 1,900 लोक कामाक आसात. दाबोळी विमानतळ खंयच्याय स्थितींत बंद जावचो ना. दाबोळी विमानतळाच्या सेवांचें शुल्क उणें करपाची मागणी सरकार केंद्रा कडेन करतले.
10 हजार राना हक्क खटल्यांतले (एफआरसी) एक हजार खटले निकालात काडल्यात. पर्वरे आदिवासी भवन जातलें.
पोरणे गोंया 10 हजार चौखण मिटर सुवातेंत म्युझियम इमारत जातली. म्युझियम इमारती खातीर केंद्रा कडल्यान 10 कोटींचे अनुदान मेळटलें. गोंय विद्यापीठ वाठारांत फार्मसी म्हाविद्यालय आनी वास्तुविशारद म्हाविद्यालय इमारत जातली.
आयआयटीचो जागो निश्चीत ना
आयआयटी खातीर सरकारान अजून मेरेन सुवात निश्चीत करूंक ना. बेगिनूच सुवात निश्चीत जातली. सांग्यार लेगीत आयआयटी खातीर सुवात निश्चीत जावपाची शक्यताय आसा.
णववेंत नापास करपाचे प्रकार
विद्यालयाचो निकाल 100 टक्के लागपा खातीर कांय अनुदानीत संस्थां कडल्यान णववेक विद्यार्थ्यांक नापास करपाचे प्रकार जाल्यात. हे प्रकार सोदपा खातीर विद्यार्थ्यांचें ट्रेकींग सुरू जालां.
राष्ट्रीय शिक्षण धोरणाची नियोजनबद्द कार्यवाही सुरू आसा. सरकार कार्यवाहीची ताकतीक करिना. पूर्व मुळाव्या पांवड्याचेर (फावंडेशन पावंड्यार) राष्ट्रीय शिक्षण धोरणाची कार्यवाही सुरू जाल्या. आंगणवाडीचो विशय अजून स्पश्ट जावंक ना. आतां मेरेन 752 पूर्व मुळाव्या शाळांची नोंदणी जाल्या. सगळ्या शिक्षकांक सरकारान प्रशिक्षण दिलां. अंदूं णववी यत्तेच्यान राष्ट्रीय शिक्षण धोरणाची कार्यवाही सुरू जाल्या. फ्रेंच, पुर्तुगीज आनी जर्मन भास घेवपाची मेकळीक आसा. मदले सुटयेंतल्या खाणाची नेमान तपासणी सुरू आसा. आप मजत गटांक 3 ते 4 म्हयन्यांत पयशें मेळटात. पांचवी ते सातवी मेरेनच्या विद्यार्थ्यां खातीर मुल्यवर्धन शिक्षण सुरू जालां. शाळांचे इमारतींची दुरूस्ती ऑक्टोबराच्यान सुरू जातली, अशें मुख्यमंत्री डॉ. सावंत हांणी चर्चेक जाप दितना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
