मोरजे दोन व्हड्यांक उजोः इकरा लाखांचें लुकसाण
भांगरभूंय | प्रतिनिधी
जमीन माफियांनी उजो लायिल्ल्याचो नुस्तेंकार वेवसायिकांचो दावो
पेडणें, प्रतिनिधी: मोरजेच्या विठ्ठलदास वाड्यावेल्या दर्यादेग वाठारांत खोपींनी सुरक्षीत दवरिल्ल्या आलेक्स फर्नांडीस हांच्या दोन व्हड्यांक उजो लागून सुमार इकरा लाखांचें लुकसाण जालें. हो उजो जमीन माफियांनी लायिल्ल्याचो दावो थळाव्या नुस्तेंमार वेवसायिकांनी केला. सरकारान आमकां न्याय दिवचो अशी मागणी थळावे पंच वांगडी विलास मोरजे, संजय कोले हांणी केल्या.
मोरजे दर्यादेग वाठारांतल्या जमनींक भांगरा परस चड मोल मेळिल्ल्यान ह्या जमनींचेर बिगर गोंयकारांचो दोळो आसा. तातूंत दर्यादेग वाठारांतल्यो जमनी ९९% बिगर गोंयकारांनी विकत्यो घेतल्यात. असल्या जमीन माफियांक सरकाराचें, राजकारण्यांचें फाटबळ मेळिल्ल्यान ह्या जमनींचेर ते दोळो दवरतात. आयज मेरेन नुस्तेंकारांच्यो परंपरीक खोंपी, व्हडीं आसात थंय वचपा खातीर आशिल्ल्यो पांय वाटोय बंद करपाचे प्रकार जमीन माफियां कडल्यान जातात. हाचे कडेन सरकार आडनदर करता.
णव वर्सां आदीं विठ्ठलदास वाड्यावेल्या दर्यादेग वाठारांत अशींच परंपरीक व्हडी सुरक्षीत दवरिल्लीं. त्या णव व्हड्यांक उजो लागपाची घडणूक घडिल्ली. तेन्ना पुलिशेंत कागाळ केल्ली. मात आजूनय ताची लुकसाण भरपाय जावंक ना. तांका कसलेच तरेचो भत्तो मेळूंक ना. जाल्यार आयज परत एक फावट अशीच एक घडणूक घडल्या. भूंय माफियां कडल्यान व्हड्यांक उजो लावपाचो प्रकार घडला. ह्या व्हड्यां सयत नुस्तेंमारी खातीर वापरपी हेर सामानूय हुलपून गोबोर जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
