भांगरभूंय | प्रतिनिधी
घरांच्या तात्पुरत्या नंबराचोय जाता गैरवापर
पणजी, प्रतिनिधीः घरपट्टी ऑनलायन भरपाची सेवा राज्यांतल्या फकत ८ पंचायतींनी आसा. भोवसंख्य पंचायतींनी कार्यालयात वचून रोख पयशें दिवन घरपट्टी फारीक करची पडटा. आमदार कार्लोस फेरेरा आनी आमदार विजय सरदेसाय हांचे तारांकीत प्रस्नाचेर पंचायत मंत्री मॉविन गुदिन्हो हांणी ही लेखी जाप दिल्या. धारबांदोडें म्हालांतल्या ४ पंचायतींनी घरपट्टी ऑनलायन भरपाची सेवा आसा. कुळें शिगांव, धारबांदोडें, किर्लपाल दाबाळें आनी मोलें ह्या पंचायतींनी शुल्काची ऑनलायन सेवा उपलब्ध आसा. धारबांदोडें म्हालांत फकत साकोर्डा पंचायतीन शुल्काची ऑनलायन सेवा उपलब्ध ना. बार्देश म्हालांत फकत नेरूल पंचायतीत ऑनलायन घरपट्टी फारीक करपाची सुविधा आसा. कळंगुटे पंचायतींत ऑनलायन घरपट्टी फारीक करपाची सुविधा सुरू करपाचे यत्न सुरू आसा. साश्ट म्हालांत बाणावलें ह्या एकाच पंचायतींत ऑनलायन घरपट्टी फारीक करपाची सोय आसा. वार्का आनी लोटलें पंचायतींत घरपट्टी ऑनलायन भरपाची सुविधा उपलब्ध जावपाची आसा. तिसवाडी म्हालांत कुडका – बांबोळें आनी ताळगांवां पंचायतीत घरपट्टी ऑनलायन भरपाची सुविधा उपलब्ध आसा. सांग्यार आनी फोंडें म्हालांत एकाय पंचायतीत ऑनलायन घरपट्टी फारीक करपाची सुविधा ना.
तरेकवार कारणाक लागून पंचायती घरांक तात्पुरतो नंबर दिता. सगळ्यां पंचायतींनी शेकड्यांनी घरांक तात्पुरतो घर नंबर दिला. काय जाणा कडून ह्या नंबराचो गैरवापर जाला. बेतोडा निरंकाल पंचायतीत घर नंबराचो – गैरवापर जाल्ल्याच्यो ९ कागाळी आयल्या. नुवें आनी धारगळ पंचायतींत घर नंबराचो गैरप्रकार जाल्ल्याची दरेकी १ कागाळ आयल्या.
कुळें – शिगांव, धारबांदोडें, किर्लपाल दाबाळें, मोलें, नेरूल, बाणावलें, कुडका बांबोळें आनी ताळगांवां ह्या पंचायतींनी घरपट्टी ऑनलायन भरपाची सुविधा आसा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
