भांगरभूंय | प्रतिनिधी
हरमल, बातमीदार: हरमलच्या बीच रोड बेकरी लागसार आशिल्ल्या बंगल्याचे बागेंतलें आंब्याचें झाड पावसाक लागून मुळा सकट हुमटून रस्त्यार पडिल्ल्यान येरादारी ठप्प जाली. रस्तो दुचाकी सोडल्यार हेर वाहनां खातीर बंद उरलो. हें झाड दुसरे वटेन आशिल्ले खोपीचेर पडूंक नाशिल्ल्यान व्हड लुकसाण जावपा पसून वाटवलें. कोणाक कांय जावंक ना.
ह्या वेळार पंच सुशांत गावडे, पंच सांतान फर्नांडीस, समाज कार्यकर्ते राजेश माजी आनी हेरांनी झाडाच्यो खांदयो तोडून दुचाकी वचपा खातीर वाट करून दिल्ल्यान येरादारी कोयंडी मात्शी उणी जाली. दनपारच्या २ वरांचेर हे झाड हुमटून पडलें. रस्त्यार येरादारी उणी आशिल्ल्यान कोणाक कांय जावंक ना. पेडणें उजो पालोवपी दळाच्या जवानांनी झाड कापून रस्तो येरादारी खातीर उक्तो केल्ल्यान पंच वांगड्यांनी समाधान उक्तायलें.
मजगतीं, ह्या भागांत रस्त्या कुशीक जायतीं धोको निर्माण करपी झाडां आनी माड आसात. तांची परिस्थिती पळयल्यार तीं केन्नाय हुमटून पडपाची शक्यताय आसा. ताका लागून उपजिल्लोधिकार्यांनी तलाठी वरवीं अहवाल तयार करून दिवचो आनी धोको निर्माण करपी झाडा काडचीं अशी मागणी पंच सांतान फर्नांडीस आनी सुशांत गावडे हांणी केली.
फाटल्या सप्तकांत, सकयल्या वाड्यावेल्या पांडुरंग खवणेंकार हांच्या घरा लागसारचें झाड पडलें आनी दुसरे दीस तांच्या घराची वणट कोसळ्ळी. तांकां लुकसाण भरपायेची गरज आशिल्ल्यान उपजिल्हाधिकारी आनी मामलेदार अधिकार्यांनी ती मेळोवन दिवपाची मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
