भांगरभूंय | प्रतिनिधी
मडगांव, प्रतिनिधी : बाणावले मतदारसंघांतल्या चडश्या दर्यादेगांचेर रस्ताद सुण्यांचो त्रास पर्यटकांक जाता. सुणे चाबपाच्यो घडणुको वाडिल्ल्यान जिल्लोधिकार्यांनी बसका घेतिल्ली. मिशन रेबिज आनी संवसारीक पशु वैजकी सेवा हांच्या जोड पालवान रस्ताद सुण्यांक धरून तांचें निर्बिजीकरण आनी लसीकरणाची प्रक्रिया सुरु आसा. आतां मेरेन 54 सुण्यांचें निर्बिजीकरण केलां.
फाटल्या कांय म्हयन्यांनी बाणावले, कोलवा, केळशी ह्या दर्यादेग वाठारांत रस्ताद सुण्यांचो त्रास बरोच वडला. कांय जाणांक सुणे चाबपाच्यो घडणुकोय घडल्यात. बाणावलेचे आमदार व्हेंझी व्हिएगस हांणी पशु वेजकी अधिकारी आनी हेर अधिकार्यां सयत बसका घेतली. जाल्यार केळशी, सुरावली सरपंचांनी जिल्लोधिकार्यांक निवेदन दिवन हे विशीं सुण्यां खातीर शेल्टर होम उबारपाची मागणी केल्ली. ते प्रमाण मिशन रेबिज आनी संवसारीक पशु वैजकी सेवा हांच्या सहकार्यांतल्यान बाणावले, कोलवा, माजोड्ड्यां वाठारांतल्या रस्ताद सुण्यांक धरून तांचें निर्बिजीकरण करपाक सुरवात केल्या. ताका लागून फुडाराक सुण्यांचो आंकडो आनी सुण्यांचो भंयूय उणो जातलो. दक्षीण गोंयच्या दर्यादेगांचेर कांय जाणांक रस्ताद सुणे चाबिल्ल्याच्यो घडणुको घडल्यात. सध्या शॅकां बंद आशिल्ल्यान सुण्यांक खावपाक मेळना. ताका लागून ह्या काळांत सुण्यांक खावपाक घालून तांका धरप सोंपें जाल्ल्यान ह्या काळाची निवड केल्या. ह्या वाठारांत देडशें ते दोनशें रस्ताद सुणीं आसतलीं असो अदमास आसा. आतां मेरेन 54 रस्ताद सुण्यांचें निर्बिजीकरण केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
