भांगरभूंय | प्रतिनिधी
१ ऑगस्टा उपरांत नुस्तेंमारी बोटी दर्यांत
मडगांव, प्रतिनिधी : बाणावले दर्यादेगेर परंपरीक नुस्तेंकारांनी प्रार्थना केले उपरांत बोट दर्यांत घालून रांपण मारून नव्या हंगामाक सुरवात केली. सध्या नुस्तेंमारीक बंदी आसा. १ ऑगस्टाक बंदी काडले उपरांत हवामानाचो अदमास घेतले. मागीर नुस्तेंमारी खातीर बोटी दर्यांत घालतले, अशें परंपरीक नुस्तेंमार्यांनी स्पश्ट केलें.
मान्सुनांत दर्यांत वचपा खातीर बोटींक बंदी घालतात. ताका लागून नुस्तेंकार भाव वेवसाय दोन म्हयने बंद दवरतात. जून सावन नुस्तेंमारीचेर आशिल्ली बंदी ऑगस्ट म्हयन्यांत काडटले. हे फाटभूंयेर कुटबण जेटी सयत दक्षीण गोंयच्या विवीध दर्यादेगांचेर नुस्तेंकारांची धांवपळ सुरू जाला. कुटबण जेटीवेल्या कांय बोटींचेर कामगार दोन म्हयन्यांच्या काळा उपरांत परत जेटीचेर दाखल जाल्यात. कांय जाण येवपाचे आसात. नुस्तेंमारी बंदी जाहीर जाले उपरांत बोटींवेले कामगार झारखंड, बिहार, उत्तर प्रदेश, ओडिशा अशा तांच्या मूळ गांवांत गेल्ले. ते आतां परत येवपाक लागल्यात. कुटबण हांगा बोटींचेर सांठवण करून दवरप, कामगारांक गरजेच्या सामानाची पुरवण करप, जेवण करपाक आयदनां, गरजेचे कपडे आनी हेर सुविधांची पुरवण करप, तशेंच बोटींवेली जाळी सांबाळपाच्या, दुरुस्तीच्या कामाक वेग आयला.
बाणावले दर्यादेगेचेर परंपरीक बोट धनयांनी बिरेस्तारा बोटींची पुजा जाली. ह्या वेळार पाद्रींनी ह्या हंगामांत नुस्तेंकारांक बरें नुस्तें मेळचें आनी कांयच वायट घडचें न्हय हे खातीर प्रार्थना केली.
बाणावले दर्यादेगेर नुस्तेंकार पेले हांणी दिल्ले म्हायती प्रमाण, राज्यांत आजूनय बरोच व्हड पावस पडिल्ल्यान दर्याय चाळवला. ताका लागून ऑगस्टांत हंगामाक सुरवात जाले उपरांतूय हवामानाचो अंदाज घेवन फुडल्या सप्तकभरांत दर्यांत बोटी घालतले. मात हवामान बरें आसल्यार ऑगस्टाच्या मजगतीं मेरेन सगळ्यो बोटी दर्यांत दाखल जातल्यो. सध्या बोटकारांनी जाळ्यांचो सांबाळ, दुरुस्ती केल्या. बोटी दर्यांत व्हरपा खातीर तयार केल्यात. तशेंच गरजेची सगळी तयारीय केल्या, अशें तांणी स्पश्ट केलें.
दोन म्हयन्यां सावन गोंयकारांक फ्रिजांत सांठोवन दवरिल्लें नुस्तें खावन दीस काडचे पडटात. आतां ताज्जें नुस्तें खावपाक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
