भांगरभूंय | प्रतिनिधी
न्यूयॉर्क, खबरां संस्था: ‘एच.आय.व्ही.’ हो एक बरोच काळ चलपी रोग आनी ह्या दुयेंसांत संबंदीत मनशाक ल्हवू ल्हवू मरण येवंक शकता. जायते जाण ह्या रोगा आड झुजतात आनी ह्या दुयेंसाक लागून जायत्या जाणांक मरण आयलां.
आतां ह्या दुयेंसाचेर प्रभावी उपचार सामान्य लोकांक मेळटले. कारण नव्या संशोधनाच्या निश्कर्शा प्रमाण ४२ हजार डॉलर मोलाचें एच.आय.वी.चें वखद फकत ४० डॉलरांत मेळूंक शकता.
अमेरिकन फार्मास्युटिकल कंपनी गिलियडान (Gilead) एचआयव्ही खातीर सामकें प्रभावी अँटीरेट्रोव्हायरल लेनाकापावीर (Lenacapavir) संशोधन केलां. ह्या वखदांचो दर दुयेंतीक ४० डॉलर मेरेन खर्च येवंक शकता. सध्याच्या ४२ हजार डॉलर्स परस हजारपट उणें आसा अशें गिलियडान एका नव्या संशोधन अभ्यासाचो अहवाल दित म्हणलां. मजगतीं, एच.आय.वी.च्या वखदांचो खर्च कांय प्रमाणांत उणो जावं येता असो अदमास काडला. सद्या एच.आय.वी.च्या वखदांचो खर्च दर मनशाक वर्साक ४२,००० डॉलर परस चड आसा. तो ४० डॉलरा परस उणो करपाक मेळटा.
मजगतीं, गिलियडन कंपनीन तयार केल्ली ही लस एच.आय.वी.ची लागण जावची न्हय म्हूण शंबर टक्के प्रभावी आशिल्ल्याचें प्राथमीक चांचण्यांनी दिसून आयलां. हें वखद वर्साक दोन फावट दिवचें पडटा. देखून एच.आय.वी.ची लागण जावची न्हय म्हूण हें वखद म्हत्वाचें थारूंक शकता असो निश्कर्श काडला.
ब्रिटनांतल्या लिव्हरपूल विद्यापिठाचो संशोधक अँड्र्यू हिल हांणी हे विशीं सांगलां, ही लस लसीकरणा सारकी आसा. म्यूनिकांत जाल्ल्या आंतरराश्ट्रीय एड्स परिशदेंत अँड्र्यू हिल हांणी हें नवें संशोधन सादर केलें. वखदां उत्पादक गिलियडान सवाय जेनेरीक इंजेक्शनाचे निर्मितीक परवानगी दिल्यार हें वखद करपाचो खर्च कितलो उणो जावं येता हें संशोधनांत मांडलें. ह्या संशोधना प्रमाण, एका वर्साचे किंमतीचें वखद ४० डॉलर्स परस उणे किमतींत दिवं येता. मजगतीं, हें वखद मुळांत एचआयव्हीचो संसर्ग जावपाचो धोका आशिल्ल्या लोकांक दिल्यार तें प्रभावी थारपाक शकता.
ह्या वखदाक लागून ह्या संसर्गाचेर नियंत्रण दवरपाक शकतात, असो निश्कर्श संशोधनांतल्यान मुखार आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
