पावसांत दुयेंत पडपाचें ना जाल्यार करात हीं तीन योगासनां

भांगरभूंय | प्रतिनिधी

पावस हो कुडीक आनी मनाक शांती दिवपाचो हंगाम. पूण होच पावसाचो हंगाम थंड वातावरणा वांगडाच वेगवेगळीं दुयेंसांय हाडटा. रोगप्रतिकार शक्त दुबळी आशिल्ल्या लोकांक तीं जावपाची चड शक्यताय आसता. कांय दुयेंसां जतनाय घेवंक ना, उपचार करुंक ना जाल्यार गंभीर जावंक शकतात. देखून दुयेंसांक बळी पडनासतना ह्या हंगामाची मजा घेवपाची आसल्यार.. ताचे पसून पयस रावपा खातीर कांय खाशेल्या योगासनांचो आदार घेवंक मेळटा.

पावसांत प्रतिकार शक्त वाडयात

जेन्ना तुमकां परत परत थंडी आनी खोंकली जाता तेन्ना दर खेपे बदलपी हवामानाक दोश दिवप योग्य न्हय, तुमची दुबळी रोगप्रतिकार शक्तय एक मुखेल कारण जावंक शकता. रोगप्रतिकार शक्त उणी आशिल्ल्यान बारीक सारीक दुयेंसां सहज जातात. तशेंच केन्ना केन्ना योग्य उपचार आनी काळजी घेवंक ना जाल्यार ताचें रुपांतर गंभीर दुयेंसांतूय जावपाक शकता. ताका लागून ह्या हंगामी रोगां पसून सुरक्षीत रावपा खातीर रोगप्रतिकार शक्त घटमूट करप म्हत्वाचें. हातूंत कांय तरेचे योग तुमकां मजत करूंक शकतात.

भुजंगासन – भुजंगासन योगाच्या सरावान फकत पोटाची चरबी उणी जायना, जाल्यार हें आसन तुमची पचनसंस्था घटमूट करता आनी रगत घोळपाक उर्बा दिता. शरिरांत रगत आनी ऑक्सिजनाचें योग्य परिसंचरण जाल्यार खुबश्या रोगांचो धोको उणो जाता. तशेंच ह्या आसनाक लागून शरिराची लवचिकताय वाडटा.

मत्स्यासन – मत्स्यासन हे न्हिदून केल्लें आसन आनी तें सद्दां केल्यार ताचे जायते लाव मेळटात. अशें केल्ल्यान पचनक्रिया निरोगी उरता. जर तुमकां थायरॉडची समस्या आसल्यार हें आसन केल्यार ताचो खूब लाव जाता.

उत्तानासन – उत्तानासन हेंय जयत्या फायद्यांनी भरिल्लें आसन. हें आसन सेगीत केल्यार पोटाची चरबी उणी जाता. तशेंच रोगप्रतिकार शक्तूय वाडटा. हें केंस आनी मुखामळार ताजेंपण हाडटा. ह्या आसनाक लागून यकृत आनी किडनींत रगताचो प्रवाह वेवस्थींत जाता. शरीर उमेदी उरता. मन शांत उरता. जाका लागून बरी न्हिद लागता आनी ताण पयस जाता.