भांगरभूंय | प्रतिनिधी
बायलांचे आशिया करंड टी-20 क्रिकेट सेमी फायनलीचें चित्र स्पश्ट जालें. पयली सेमी फायनल सध्याचो वस्ताद भारत आनी बांगलादेश ह्या पंगडां मदीं जातली. ही मॅच फाल्यां दाम्बुलांत दनपारां दोन वरांचेर सुरू जातली. दुसरी सेमी फायनल पाकिस्तान आनी येजमान श्रीलंका ह्या पंगडां मदीं फाल्यां सांज वेळार जातली.
भारतान अ गटांतली पयली सुवात मेळयिल्ली. जाल्यार बांगलादेश ब गटांत दुसरे सुवातेर उरिल्लो. भारतान गटांतल्यो तिनूय मॅची जिखल्यात. जाल्यार बांगलादेशाक गट पांवड्यार श्रीलंके आड हार घेवची पडिल्ली.
बांगलादेशान काल मलेशिया पंगडाक 114 धांवड्यांनी हारयलो. ताची सेमी फायनलींतली सुवात निश्चीत जाल्ली. पूण, तो कोणा आड खेळटलो हें स्पश्ट जावंक नाशिल्लें. ते खातीर तांकां श्रीलंका आनी थायलॅण्ड ह्या पंगडां मदीं जाल्ले मॅचीचे निकालाची वाट पळोवची पडली. थायलॅण्डाक निर्धारीत 20 ओव्हरींनी फकत 93 धांवड्यो केल्यो. ते उपरांत श्रीलंकेक सेमी फायनलींत सुवात मेळोवपाक 16 धांवड्यो आनी ब गटांतली पयली सुवात मेळोवपाक 48 धांवड्यांची गरज आशिल्ली. श्रीलंकेन 48 धांवडी घेतल्या उपरांत सेमी फायनलीचें चित्र स्पश्ट जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
