भांगरभूंय | प्रतिनिधी
25 जाणांचेर कारवाय; विधानसभेच्या पटलार नुस्तेमार मंत्र्याची म्हायती
प्रतिनिधी । भांगरभूंय
पणजीः नुस्तेमारी खात्यान दर्यादेगेर एलईडी लायट वापरून नुस्तेमारी करतना तशेंच नुस्तेमारी बंदी मोडून दर्यांत नुस्तें मारपी 25 जाणांचेर कारवाय करून तांकां 3,02,155 रुपयांचो दंड दिला. 2022 चे तुळेंत 2023 त नुस्तेमार खात्यान एलईडी लायटीचो वापर करप्यांच्या दंडात खूब वाड केल्या, अशी म्हायती नुस्तेमार मंत्री निळकंठ हर्णकार हांणी दिली.
नुस्तेमारी कायदो मोडिल्ले विशींचो प्रश्न नुस्तेमार मंत्र्याक कुडतरीचे आमदार आलेक्स लॉरेन्स हांणी विचारिल्लो. हाचेर म्हायती दितना मंत्र्यान सांगलें, 2022 ते 2023 मेरेन एलईडी नुस्तेमारी करप्यांक 2,44,975 आनी
नुस्तेमारी बंदी मोडप्यांक 57,140 रुपयांचो दंड दिला.
2021 ते 2023 मेरेन एलईडी लायट वापरून नुस्तेमारी करपी 17 जाणांचेर कारवाय केल्या. 2021 त 6 जाणांचेर कारवाय केल्ली. बाणावले, मोबोर केळशी, वार्का, चिचणी, गोवा वेल्हा आनी कोलवाच्या नुस्तेकारांचो हातूंत आस्पाव आसा. तांकां दंड कितलो दिला हाचे तपशील खात्यान दिवंक ना.
2022 त 6 जाणांचेर कारवाय जाल्ली. तातूंत बाणावली, वास्को, कोलवा, पर्वरी, रत्नागिरी आनी बांबोळेच्या नुस्तेकारांचो आस्पाव आसा. तांकां 20 हजार रुपयांचो दंड दिला. 2023 त 5 जाणांचेर कारवाय जाल्ली. तातूंत आगशी, पणजी, आगशी, खारीवाडो आनी वास्कोच्या नुस्तेकारांचो आस्पाव आसा. तांकां 2,24,975 रुपयांचो दंड दिला. जाल्यार नुस्तेमारी बंदी मोडपी आठ जाणांचेर कारवाय जाल्या.
2021 त ही बंदी मोडूंक ना, अशें खात्यान म्हणलां. 2022 त बंदी मोडपी 7 जाणांचेर कारवाय करून 56,640 रुपयांचो दंड दिला. 2023 त एकूच उल्लंघन नोंद जावन 5 हजार रुपयांचो दंड दिला.
एलईडी नुस्तेमारी आनी नुस्तेमारी बंदी काळांत नुस्तेमारी हाका लागून दर्यांत नुस्त्याची पैदास उणीं जाल्या. पूण जेन्ना दर्यांत नुस्त्यांची पैदास उणी जावप ह्या विशयाचेर अभ्यास जाला? तशेंच हाच्या फाटलें कारण कितें आसा, असो प्रस्न उपस्थीत केलो. हाचेर जाप दितना असो कसलोच अभ्यास जावंक ना आनी कारणां कितें तीं खबर ना, अशें खात्यान सांगलें. पूण नुस्त्यांची पैदास तशेंच नुस्तेकारांची जीण राखपा खातीर खूबशे उपक्रम हातांत घेतल्यात अशे खात्यान सांगलें.
ह्या उपक्रमा खाला गोंयच्या दर्यादेग वाठारांत पावसाळ्यांत 1 जून ते 31 जुलय मेरेन नुस्तेमारी बंदी घातल्या. तशेंच कांय वाठारांनी बूल ट्रोलर, एलईडी लायट, नुस्तें दिवपकावपी लायटी, जनरेटर आनी जनरेटर नासतना यांत्रिकी नुस्तेमारी बोटी, मोटरायझड ट्रोलर, पर्सीन आनी गील नेटींळ पद्दतीचेर बंदी घातल्या, अशें खात्यान सांगलें.
जिलेटीन, रसायनांचेर बंदी घालपाक तजविजो
गोंय दर्या नुस्तेमारी नियमन कायदो 2019 खाला नुस्ते धरपा खातीर 24 मिलीमिटर परस उण्या जाळ्यांक आनी सुंगटां धरपा खातीर 20 मिलीमिटर जाळ्यांक नुस्तेमारी परवानो दितात. गोंयांत 20 नुस्त्यांच्या प्रजातीं खातीर कायदेशीर आकाराची अंमलबजावणी केल्या. खात्यान गोंयच्या दर्यादेगांचेर कृत्रीम पोंवळ्यांचो चोंबो तयार करपाक प्रक्रिया सुरू केल्या. तशेंच न्हयांतलें आनी दर्यांतलें नुस्तें जिलेटीन फोडून आनी हेर रसायनां वापरून मारपाक बंदी घालपा खातीर तजविजो केल्यात, अशी म्हायती खात्यान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
