भांगरभूंय | प्रतिनिधी
पणजीः गोंयांतल्लया 67.5 टक्के मतदारसंघांत फावोश्या प्रमाणांत उदका पुरवण जायना. 40 तल्या 27 मतदारसंघांनी उदकाची मागणी चड आनी पुरवण उणी आसा. कळंगूटे, शिवोली, पर्यें ह्या मतदारसंघांनी सगळ्यांच चड उदकाचो उणाव आसा. मुख्यमंत्री डॉ. प्रमोद सावंत हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे विशीं आमदार विरोश बोरकार हांणी अतारांकीत प्रस्न विचारिल्लो.
जापेंत दिल्ले म्हायती प्रमाण जुलय 2023 ते जून 2024 मेरेन पर्यें मतदारसंघांत म्हयन्याक 22.02 दशलक्ष लिटर (एमएलडी) उदकाची मागणी आशिल्ली. मात थंय फक्त 13.80 ते 14.20 एमएलडी उदका पुरवण जाल्या. थंय म्हयन्याक सुमार 7.81 ते 8.12 एमएलडी उणी उदका पुरवण जाल्या. ते उपरांत कळंगूटे म्हयन्याक 16.20 ते 20 एमएलडी उदकाची मागणी आशिल्ली, मात थंय फक्त 9.10 ते 9.20 एमएलडी उदका पुरवण जाल्या. थंय म्हयन्याक 6.90 ते 10.85 एमएलडी उणी उदका पुरवण जाल्या. तशेंच शिवोली मतदारसंघांत म्हयन्याक 14.9 ते 15.59 एमएलडी उदकाची मागणी आशिल्ली. थंय फक्त 8.4 ते 8.5 एमएलडी उदका पुरवण जाल्या. थंय म्हयन्याक सुमार 6.4 ते 7.19 एमएलडी इतली उणी उदका पुरवण जाल्या. मांद्रें मतदारसंघांत म्हयन्याक 15.6 ते 18.96 एमएलडी उदकाची मागणी आशिल्ली. थंय म्हयन्याक 6.5 ते 15.08 एमएलडी मेरेन उदका पुरवण जाल्या. थंय म्हयन्याक सुमार 3.9 ते 9.1 एमएलडी इतली उदका पुरवण जाल्या.
13 मतदारसंघांनी फावोशें उदक
पोरूं वर्सभरांत 40 तल्या 13 मतदारसंघांनी मागणी तितली उदका पुरवण केल्या. तातूंत पर्वरी, नुवें, कुडतरी, नावेली, कुंकळ्ळी, वेळ्ळी, बाणावली, फातोड्डें, मडगांव, कुठ्ठाळी, दाबोळी, वास्को आनी मुरगांव हांचो आस्पाव आसा, अशी म्हायती जापेंत दिल्या.
कळंगूटे सगळ्यांत चड कनेक्शनां
भौशीक बांदकाम खात्यान पोरूं वर्सभरांत कळंगूटे सगळ्यांत चड 55 नवीं उदकाचीं कनेक्शनां दिल्यांत. तातूंत इमारत, बांदकाम प्रकल्प आनी गृहनिर्माण प्रकल्पांचो आस्पाव आसा. 2022 सावन गोंयांत वट्ट 323 बांदकाम प्रकल्पांक उदकाचीं उपलब्धता आशिल्लीं प्रमाणपत्रां दिल्यांत, अशें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
