भांगरभूंय | प्रतिनिधी
मडगांव, प्रतिनिधी : परत परत लायट वचप चालूच आसा. ह्या वेळार कागाळ करपा खातीर कॉल करता तेन्ना वीज खात्याचे लायनमन वा अधिकारी फोन घेनात. कार्यालयांत कोणूच नासता वा संपर्क करपूय शक्य नासतना. ताका लागून लायट गेल्यार ती केन्ना येतली हाची म्हायती मेळपा खातीर गरजेचे उपाय करपाची मागणी कुडटरेच्या नागरिकांनी अधीक्षक अभियंते राजीव सामंत हांची भेट घेवन केली.
मायणा- कुडटरेच्या नागरिकांनी जिल्लो पंचायत वांगडी मिशेल रिबेलो आनी मरिनो रिबेलो हांच्या नेतृत्वा खाला मडगांवच्या वीज खात्याच्या कार्यालयाक भेट दिली. पावसांत झाडां पडून लायट वचपाच्यो घडणुको घडतूच आसतात. केन्ना केन्नाय वार्यान झाडाच्यो खांदयो लायटीच्या सरयांक लागल्यार लायट वता आनी त्यो खांदयो परत आसल्यो तश्यो जाग्यार गेल्यार वीज खात्याक थंय जाल्लो इबाड सारको करप शक्य जायना. वीज कर्मचारी लायटीची पुरवण सुरळीत दवरपाक वावुरतात अशें सामंत हांणी सांगलें. कर्मचार्यांनी गरजेची म्हायती लोकांक दिल्यार त्रास उणे जावपाक शकतात. हाचेर तांणी कुडटरेच्या व्हॉट्सअप ग्रुपाक कनिश्ठ अभियंत्यांचो नंबर दिवन ताचेर ते गरजेची दितले अशेंय स्पश्ट केलें. हे बसकेक कुडटरे कार्यरत अभियंत्यांकूय आपयल्ले.
जमनी पोंदच्या वीज सरयांचें काम फुडल्या पावसा पयलीं : सामंत
कुडटरेच्या विभागांत फोंडेंच्यान येवपी वीज सरयांचे आठ खांबे तुटल्यात. ते आदलेवरीं करतात. जमनी पोंदच्या सरयांचें ७ कोटींचें जें काम पुराय जालां ताचे वेल्यान विजेची पुरवण करतले. तशेंच ५१ कोटींचो आनी ११ कोटींचो अशे दोन प्रकल्प फुडल्या पावसा पयलीं पुराय करतले. कर्मचारी हेर कामांत उरिल्ल्यान रस्त्यावेल्या लायटींच्या दुरुस्तीचें काम बेगीनूच पुराय करतले, अशें सामंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
