भांगरभूंय | प्रतिनिधी
पणजीः राष्ट्रीय खेळां सर्त आनी पॅरा ऑलिंपीक सर्तीत पदकां जिखिल्ल्या गोंयकार खेळगड्यांक जाहीर केल्ली इनामां येते चवथी पयलीं भेटयतले. ते भायर पॅरा ऑलिंपीक संघटणेकय मान्यताय दितले अशी हमी खेळां मंत्री गोविंद गावडे हांणी बुधवारा विधानसभा सभाघरांत दिली.
आमदार केदार नायक हांणी प्रस्न-जाप वेळार हो प्रस्न मांडलो. पॅरा ऑलिंपीक संघटणेक खेळां प्राधिकरणाची मान्यताय मेळ्ळे बरग निधी दिवंक मेळना. संघटनेन 2011 वर्सा खेळां प्राधिकरणाकडेन मान्यताये खातीर कागदपत्रां सादर केल्यात. तांचे कडल्यान आनीक गरजेची कागदपत्रां घेवन संघटणेक मान्यताय दितले. हे संबंदी प्रक्रिया चालू आसा अशें मंत्री गावडे हांणी सांगलें.
पॅरिसांत जावपी पॅरा ऑलिंपीक सर्तीत फकत तीन ते चार म्हयने उरल्यात. हाचे खातीर राज्य सरकारान कशी तयारी सुरू केल्या, ताचे खातीर गोंयचे सर्तक निवडल्यात काय ना हाचेर आमदार जीत आरोलकार हांणी प्रस्न उप्रासलो. ताचेर जाप दितना, पॅरा ऑलिंपीक सर्ती खातीर खेळगड्यांची निवड राष्ट्रीय पॅरा ऑलिंपीक संघटणा करता. तातूंत वांटो घेवपी गोंयच्या खेळगड्यांक पुराय सहकार दितले. विशेश खेळगड्यांक सर्तीची तयारी करपा खातीर गरजेच्यो सगळ्यो सुविधा गोंयांत मेळटात हें दोन फावटीं जाल्ल्या पर्पल फेस्तांतल्यान स्पश्ट जाला असो उल्लेख मंत्री गावडे हांणी केलो.
राष्ट्रीय आनी आंतरराष्ट्रीय पांवड्यार खाशेल्या खेळगड्यांची निवड जाले उपरांत तांचे वांगडा काळजी घेवपी धाडपाची गरज आसा आनी पदकां जिखिल्ल्या खेळगड्यांक बेगीनांत बेगीन जाहीर केल्ली इनामां दिवन तांकां प्रोत्साहन दिवपाची गरज आसा अशें आमदार विजय सरदेसाय हांणी सांगलें. ताचेर राष्ट्रीय आनी आंतरराष्ट्रीय पांवड्यार वचपी विशेश खेळगड्या वांगडा काळजी घेवपी धाडटात अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
