भांगरभूंय | प्रतिनिधी
कुशळटायेचेर आदारीत नोकऱ्यां परस वेवसायीक करियराक चड प्राधान्य
नवी दिल्ली, खबरां संस्था ः गरीब कुटुंबातल्यो चलयो आपल्या करियरा खातीर व्हड सपनां पळयतात अशें युनिसेफाच्या युवाह आनी आयड्रीमकॅरियर (YuWaah and iDreamCareer) सर्वेक्षणांतल्यान दिसून आयलां. सुमार 69 टक्के चलयो कुशळटायेचेर आदारिल्ल्या करियरा परस (ब्युटी पार्लर, हॉस्पिटॅलिटी) दोतोर, अभियंते, पत्रकार अशी वेवसायीक करियरा निवडटात. दुसरे वटेन भुरगीं वेगवेगळ्या करियर मार्गां विशीं शिकतात, वेगवेगळ्या करियरा खातीर जाय आशिल्लीं गरजां आनी कुशळटाय समजतात, मार्गदर्शन आनी समुपदेशन घेतात.
युनिसेफ अहवालाचो हो निश्कर्श 4968 वांटेकार जाल्ल्यांच्या प्रतिसादांचेर आदारीत आसा. तातूंतले 2999 विद्यार्थी वेवसायीक करियर जाल्यार 704 विद्यार्थी कुशळटाय आदारीत करियर पसंत करतात.
वेवसायीक करियराक चलयांची चड पसंती
वेवसायीक करियरा खातीर विद्यार्थ्यांचें लिंग प्रमाण (gender-wise) वांटपाचे नदरेन 1872 विद्यार्थिनींनी (72.42 टक्के) शाळेंतल्या शिक्षणा उपरांत वेवसायीक करियर करपाचें थारायलां. तेच प्रमाण 704 विद्यार्थ्यां मदल्या 56.25 टक्के विद्यार्थ्यांनी वेवसायीक करियर निवडला. दोनूय प्रकरणांत हो आंकडो चले विद्यार्थ्यां परस चड आशिल्लो.
विशेश म्हळ्यार 21 वेवसायीक करियर क्लस्टरांत सरकारी आनी संरक्षण सेवा ही चले आनी चलयो ह्या दोगांयच्या करियर निवडी खातीर चड लोकप्रिय निवड आशिल्लीं. हेरां परस चलयांनी वैजकी शास्त्र आनी अध्यापन सारकिल्ले करियर पर्याय पसंत केल्ले जाल्यार चल्यांनी अभियांत्रिकी आनी तंत्रगिन्यानाक प्राधान्य दिले.
विद्यार्थ्यांच्या करियर निवडीचेर कोणाचो चड प्रभाव?
ते भायर ह्या निश्कर्शावेल्यान अशें दिसून आयलां कि, चले आनी चलयेच्या दोनूय विद्यार्थ्यां खातीर करियर संबंदीत निर्णय घेवपाक कुटुंबांतले वांगडी (30 टक्के), शाळेचे शिक्षक (13 टक्के), इश्ट (4 टक्के) मुखेल प्रभावी आसात. हेर 4 टक्के वांटो घेवप्यांनी भायल्या वा शाळेच्या सल्लागारांची मजत घेतली, जाल्यार उरिल्ल्या 49 टक्के वांटो घेवप्यां कडेन ह्या प्रस्नाक जाप नाशिल्ली. तशेंच वट्ट वांटो घेवप्यां मदल्या 9.36 टक्के (4968 मदल्या 465) जाणांक अभ्यासा पयलीं करियर मार्गदर्शन मेळिल्लें अशेंय ह्या निश्कर्शातल्यान स्पश्ट जालां.
अशें जाले सर्वेक्षण…
युनिसेफान 25 भारतीय राज्यांतल्या यत्ता णवी ते बारावीतल्या विद्यार्थ्यां कडल्यान ही म्हायती एकठांय केल्या. पांच म्हयन्यांच्या काळांत (ऑगस्ट 2023 – डिसेंबर 2023) वट्ट 4968 प्रतिसाद एकठांय करुन विश्लेशणा खातीर वापरले. 4968 वांटो घेवप्यां मदीं चलयांचो आंकडो 3022 (61.5 टक्के) आनी चल्यांचो आंकडो 1946 (39.17 टक्के) आशिल्लो. ह्या अभ्यासांत वांटेकार जावपी मुखेलपणान हिंदी भास उलोवपी आसात, जे उण्या उत्पन्नाच्या कुटुंबांतले आसात.
वट्ट 1740 विद्यार्थी बारावी वर्गांत आशिल्ले, तातूंतले 520 चले आनी 1200 चलयो आशिल्ल्यो. वट्ट 1196 विद्यार्थी इकरावी वर्गांतले तातूंतले 497 चले आनी 669 चलयो. यत्ता धावीतले वट्ट 1227 तातूंतले 520 चले आनी 707 चलयो. यत्ता णवीतले वट्ट 805 विद्यार्थी आशिल्ले, तातूंतले 389 चले आनी 426 चलयो आशिल्ल्यो. 95 टक्के वांटो घेवप्यांची वर्सुकी येणावळ 1.4-3.4 लाख रुपया आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
