भांगरभूंय | प्रतिनिधी
थळावे नागरीक सुकाजी नायक हांचो गंभीर आरोप
कोरगांव, बातमीदार: दांडोसवाडो- मांद्रें गटार कोसळून सुमार एक वर्स जावन गेलें तरी तें दुरुस्त करूंक ना. हाका कारण थळावी पंच संपदा आजगांवकार आनी तिचो घरकार गोविंद आजगांवकार आसा, असो गंभीर आरोप थळावे नागरीक सुकाजी नायक हांणी केला. पंचायत बसकेंत थाराव घेवन ४० दीस पुराय जाल्यात. मात पंच वांगड्यांनी सय करूंक नाशिल्ल्यान उदरगतीच्या कामांची निविदा काडप शक्य जायना आनी हाचे पुरावे आमचे कडेन आशिल्ल्याचेंय तांणी स्पश्ट केलें. ताका लागून आमच्या प्रभागांत उदरगतीचीं कामां आडावपाक स्वता पंचाचोच हात आसा अशें मुखार आयलां, अशें तांणी सांगलें.
५ जून २०२४ दिसा पंचायत बसकेंत स्वता पंच वांगडी संपदा हांणी थाराव मांडलो. मात पंच अंडरटेकिंगाचेर सय करिना. फकत तांचे एक सये खातीर उदरगतीचीं कामां आडकून पडल्यांत. दांडोसवाडो प्रभाग ११ हांगाच्या यशवंत सुकाजी नायक हांच्या घरा लागसारच्या व्हाळाची कोसळिल्ली वणत परत बांदची असो प्रस्ताव स्वता पंच वांगड्यांनी मांडिल्ल्यान आतां ती ताचेर सय करपाक कित्याक वेळ काडटा? असो प्रस्न नायक हांणी केलो.
अंडरटेकिंग गरजेचें आशिल्ल्यान कांय पंच वांगडी ताचो गैर वापर करतात. हाचेर संबंदीत खात्यान कारवाय करपाची मागणी तांणी ह्या वेळार केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
