भांगरभूंय | प्रतिनिधी
भारताची अर्थ मंत्री निर्मला सीतारामण हांणी संसदेंत 2024-25चो सर्वसादारण अर्थसंकल्प सादर केलो. ह्या अर्थसंकल्पा प्रमाण खेळां खात्याच्या निधींत व्हडलीशी वाड करूंक ना. पूण, खेलो इंडिया प्रकल्पाचेर सगल्यांत चड भर दिला.
सीतारामण हांणी 2024-25 खातीर खेळां मळा खातीर 3,442.32 कोटींचो निधी जाहीर केला. हातूंतली 900 कोटी रुपयांची तरतूद ही खांचीकोनशांतल्या खेळाक उर्बा दिवपा खातीर खेलो इंडिया प्रकल्पा खातीर केल्या.
फाटल्या अर्थसंकल्पांत खेलो इंडिया खातीर 880 कोटी रुपयांचो निधी जिल्लो. ह्या वेळार तातूंत 20 कोटींची वाड केल्या.
मजगतीं, 26 जुलय सावन पॅरीस ऑलिम्पिकाक सुरवात जाता. तशेंच राष्ट्रकूल आनी आशियायी खेळां सर्तीक दोन वर्सांचो कालावधी आसा. हे फाटभुंयेर फाटले खेपे परस हे खेप फकत 45.36 कोटींचो वाड खेळां निधींत केल्या. 2023-24 खातीर 3397.32 कोटींचो निधी मंजूर केल्लो.
2018 सावन सुरू केल्ले खेलो इंडिया प्रकल्पा खातीर सरकारा कडल्यान सातत्यान ताच्या विस्ताराचो यत्न चालू आसा. 2023त खेलो इंडिया पॅरा गेम्स लेगीत सुरू केल्यात.
मजगतीं, 2024-25च्या खेळां निधीतले 340 कोटी रुपया नॅशनल स्पोर्ट्स फॅडरेशनाक मंजूर केल्यात. अंदूंत हातूंत 15 कोटींची वाड जाल्या. तशेंच भारतीय खेळां प्राधिकरणाक अंदूं 822.60 कोटी रुपया मंजूर केल्यात.
हाचे खेरीत नॅशनल अॅण्टी डोपींग एजन्सी (नाडा) आनी नॅशनल डोप टॅस्टींग लॅबोरेटरी (एनडीटीएल) हांचे निधीत लेगीत मात्शी वाड केल्या. नाडाक 21.73 कोटी जाल्यार एनडीटीएलाक 22 कोटी रुपया मेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
