भांगरभूंय | प्रतिनिधी
६ निविदांचेर फारीक केले ४५ कोटी ९६ लाख
पणजी, प्रतिनिधी : कला अकादमीच्या नुतनीकरण कामाक २० म्हयन्यांचो कळाव जालो आसतानाच ६ निविदांचेर ४५ कोटी ९६ लाख रूपया फारीक केल्यात. आमदार दिगंबर कामत हांच्या तारांकीत प्रस्नाक कला आनी संस्कृती मंत्री गोविंद गावडे हांणी ही लेखी जाप दिल्या.
कला अकादमीच्या नुतनीकरणाचे काम ३ मे २०२१ दिसा सुरू जाल्लें. तें एका वर्सात म्हळ्यार ३ मे २०२२ मेरेन पुराय जावपाचें आसलें. कामाक कळाव जावन तें ८ जानेवारी २०२४ दिसा पुराय जालें. सावंड सीस्टम, स्टेज लायट, सीसीटीव्ही, स्टेज क्राफ्ट ह्या कामाक लागून कळाव जालो, अशें कारण लेखी जापेंत दिलां. स्ट्रक्चरल काम, इलेक्ट्रीकल वर्क, ड्रेनेज हाचे निविदेचे ३६ कोटी ४३ लाख रूपया कंत्राटदाराक फारीक केल्यात. ही निविदा ३ मे २०२१ तारखेक जारी केल्ली.
वॉटरप्रुफींग, फायर प्रोटेक्शन सीस्टीम निविदेचे ४३ लाख ४९ हजार रूपया कंत्राटदाराक फारीक केल्यात. ही निविदा १५ फेब्रुवारी २०२३ तारखेक जारी केल्ली. स्ट्रक्चरल वर्क आनी सर्वेलन्स सीस्टीमवेल्या निविदेचे १ कोटी ४५ लाख रूपया कंत्राटदाराक दिल्यात. ही निविदा १५ फेब्रुवारी २०२३ तारखेक जारी केल्ली. स्टेज लायटनिंग, स्टेज क्राफ्ट निविदेचे २ कोटी १२ लाख रूपया कंत्राटदाराक फारीक केल्यात. ही निविदा १५ फेब्रुवारी २०२३ तारखेक जारी केल्ली. बोर वेल लॅटरायट क्लेडिंगा खातीर ७० लाख ७३ हजार रूपया कंत्राटदाराक फारीक केल्या. ही निविदा १५ फेब्रुवारी २०२३ तारखेक जारी केल्ली.
एचवीएसी, वॉटरप्रुफींग कामाच्या निविदेचे ४ कोटी ८० लाख रूपया फारीक केल्या. ही निविदा २७ फेब्रुवारी २०२३ तारखेक जारी केल्ली. सगळ्यो निविदा टेक्थोन बिल्डकॉम प्रायव्हेट लिमिटेड कंपनीक जारी केल्ल्यो.
४ कोटी उणी रक्कम फारीक केल्यात
नुतनीकरणाच्या ६ निविदांच्या कामाची रक्कम ५० कोटी ९ लाख रूपया जाता. हांतूतले ४५ कोटी ९६ लाख रूपया कंत्राटदाराक फारीक केल्यात. लागीं लागीं ४ कोटी रूपया कंत्राटदाराक उणें फारीक केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
