भांगरभूंय | प्रतिनिधी
पणजी ः टपाल खात्याच्या गोंय विभागांत ग्रामीण डाक सेवकांच्या 76 पदांचेर भरती जातली. हे खातीर पात्र उमेदवारांकडल्यान ऑनलायन पद्दतीन अर्ज मागयल्यात. हे अर्ज https://in-diapostgdsonline.gov.in ह्या संकेतथळार ऑनलायन पद्दतीन भरचे पडटले. 15 जुलयाक अर्ज करपाची प्रक्रिया सुरू जाल्या आनी निमाणी तारीक 5 ऑगस्ट आसा.
टपाल खात्यान ग्रामीन डाक सेवक (जीडीएस), शाखा पोस्टमास्टर (बीपीएम), सहाय्यक शाखा पोस्टमास्टर (एबीपीएम), डाक सेवक ह्या पदां खातीर अर्ज मागयल्यात. गोंयांत ग्रामीण डाक सेवकांचीं 76 पदां आसात. हे संबंदी टपाल खात्याच्या गोंय विभागाच्या वरिश्ठ अधीक्षकांनी पंचायत, देवस्थान समितीचे अध्यक्ष चर्चचे पेरीश प्रिस्ट हांकां ह्या जाग्यां संबंदी नोटीस धाडून म्हायती दिल्या.
टपाल खात्याच्या गोंयांतल्या पदां खातीर फकत थळाव्या लोकांक संद दिवची अशी मागणी आसा. हाचे आदीं गोंयांतल्या टपाल खात्यांत हेर राज्यांतल्या उमेदवारांक संद मेळ्ळी असो आरोप जाल्लो. कांय वर्सां आदीं केंद्रीय मंत्री श्रीपाद नायक हांणी हे विशीं आपली नाराजगी उक्तेपणान उक्तायिल्ली. गोंयांतल्या केंद्रीय कार्यालयांत थळाव्या लोकांक संद मेळना अशें तांणी सांगिल्लें. हे विशीं केंद्रा कडेन चर्चा करतले अशेंय तांणी स्पश्ट केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
