भांगरभूंय | प्रतिनिधी
कोणें कितलेंय ना म्हणलें, तरी भारतीय राजकारणांत जात, धर्म म्हत्वाचो आनी तो उमेदवाराच्या जैतांत म्हत्वाची भुमिका करता. भारतांत कोट्यांनी मतदार अशिक्षीत, दुसऱ्यांचें आयकून मतां दिवपी म्हणून तांची दिशाभूल करप सोंपें, भलत्याच गजालींक राजकारणांत म्हत्व आयलां, अशें कांय जाण म्हणटात. पूण सुशिक्षीत, गिरेस्त अमेरिकाय हाका आडवाद ना. थंयूय उमेदवाराचो वंश, मूळ देश म्हत्वाचो, अशें दिसून आयलां. अध्यक्ष ज्यो बायडेन (डेमोक्रॅटीक पार्टी) वेंचणूक रिंगणांतल्यान भायर सरले आनी तांच्या जाग्यार आतां उपाध्यक्ष कमला हॅरीस हांचें नांव मुखार आयलां. रिपब्लीकन पार्टीचे उमेदवार डोनाल्ड ट्रम्प हे बायडेन परस मुखार आशिल्ले. आतां कमला हांणी हें अंतर उणें केलां. म्हणल्यार बायडेन परस त्यो थोड्यो मुखार आसात, अशें एका सर्वेक्षणांत दिसून आयलां. पूण तांकां जैत मेळटलें कांय ना, तें येवपी काळूच सांगतलो. मुळांत तांच्या नांवाची पक्षान पयलीं निवड करपाक जाय, हेंवूय तितलेंच खरें. शिकागोंत आॅगस्टांत डेमोक्रॅटीक पार्टीची बसका जाता, तातूंत उमेदवाराच्या नांवाचेर निमणी म्होर बसतली.
ज्यो बायडेन हांची पिराय 81 वर्सां. तांकां यादूय उरना. ताचे व्हिडीयो हालींच व्हायरल जाल्यात. तांणी उमेदवारीचेर दावो करचो न्हय, अशें पक्षांतल्या फुडाऱ्यांक दिसता. (लोकांकूय तशेंच दिसता, हें सर्वेक्षणांतल्यान मुखार आयलां.) आतां बायडेन हांणी स्वताच फाटीं पावल घाल्ल्यान हो प्रस्न सुटला. तांणी कमला हांचें नांव मुखार केलां, म्हणटकच तिका उमेदवारी मेळपाची चड शक्यताय आसा.
कमला हॅरीस हांचो जल्म, शिक्षण अमेरिकेंतूच. थंय जल्म जाल्ले मूळ भारतीय हे नांवा पुरते भारतीय आसतात, हें आमी मानून घेवपाक जाय, पूण जे भारतीय आवय वा कुटुंबा वांगडा रावल्यात, तांचेर भारतीय संस्कार जाल्यात. भारता विशीं तांकां ओड, उमळशीक आसा. चेन्नयची शास्त्रज्ञ श्यामला गोपालन् 1959 वर्सा शिक्षणा खातीर अमेरिकेक गेल्ली. थंय तांची जमैकाचे विद्यार्थी डोनाल्ड हॅरीस हांचे कडेन वळख जाली. उपरांत मोग आनी लग्न. तांकां दोन चलयो जाल्यो. तांचीं नांवां कमला आनी माया. घटस्फोटा उपरांत दोनूय चलयो श्यामला हांचे कडेन आशिल्ल्यो. त्यो अमेरिकन पद्दतींत वाडल्यो, पूण तांचेर भारतीय संस्कारुय जाल्यात. कमला हांचें नांव अध्यक्ष म्हूण मुखार येतकच लाखांनी भारतीयां मदीं उमेदीचें वारें व्हांवपाक लागलां. खास करून तामिळनाडूंत. जर कमला हॅरीस हांकां उमेदवारी मेळून जिखल्यो जाल्यार अमेरिकेच्या 248 वर्सांच्या इतिहासांतल्यो त्यो पयल्यो बायल अध्यक्ष थारतल्यो. सिनेटांत वेंचून येवपी त्यो पयल्यो आशियायी बायल. दुसऱ्यो आफ्रिकन- अमेरिकन.
वयर म्हणलां ते प्रमाण अमेरिकेंत रावपी मूळ आफ्रिकन, वेस्ट इंडियन, भारतीय आनी आशियायी लोकांचीं मतां कमला हॅरीसाक पडपाची शक्यताय आसा. ते वटेन रिपल्बीकन पक्षाचे उपाध्यक्ष जेडी व्हॅन्स हांची घरकान्नूय भारतीय. (उषा चिलुकुरी, विशाखापट्टण) तेय भारतीयांक मतां खातीर उलो मारतलेच. कमला हॅरीस आनी तिचे घरकार डग्लस एम्होफ वकील. म्हणटकच साबार केशी आशिल्ल्या ट्रम्प हांकां कमला युक्तीवादांत हारोवपाची शक्यताय न्हयकारपाक येना. तशी कमला हॅरीस आक्रमक म्हूण प्रसिद्ध आसातूच. सुरवातेक कमला राजकी फुडारी म्हूण यशस्वी थारूंक नाशिल्ल्यो. आंतरराष्ट्रीय प्रस्न, संबंदा विशींय तांचें काम पेजाद म्हणटात तशें नाशिल्लें. मात, आतां त्यो राजकारणांत मुरल्यात. डेमोक्रॅटीक पक्षांत, भायरुय तांचे चाहते निर्माण जाल्यात. अमेरिकेंत येवपी भायल्या लोकां विशीं अमेरिकेंत एक प्रकारचो दुस्वास तयार जाला, तोय हालींच्या वर्सांनी. डोनाल्ड ट्रम्प हांणी ताका सारें, उदक घालां. कमला हॅरीस हांचे बाबतींत होच मुद्दो घेवन ट्रम्प प्रचाराक देंवले जाल्यार ताचो परिणाम जातलोच. खास करून अमेरिकेंतले ‘राष्ट्रवादी’ लोक ट्रम्प हांचे वटेन रावतले. तातूंत हालींच फारपेटीची घडणूक जाली, ताचीय इल्ली तरी सहानुभूती ट्रम्प हांकां मेळटली. बायडेन आशिल्ले जाल्यार तांचे पिरायेचें भांडवल करून ट्रम्प हांकां सहज मतां पुंजावपाक मेळपाचीं. कमला हांचे बाबतींत तें करपाक मेळचें ना. कारण तांची पिराय फक्त 59 वर्सां. हाचो फायदो कमला हांकां जावं येता. आदले वेंचणुकेंत हिलरी क्लिंटन आनी ट्रम्प हांचे मदीं लढत जाल्ली. तातूंत ट्रम्प जैतिवंत जाल्ले. त्या वेळार अमेरिकेच्या कांय राज्यांनी हिलरी हांचो प्रभाव पडूंक नाशिल्लो. बायल उमेदवार हें ताचे फाटलें कारण अशें त्या वेळार कांय जाणकारांनी म्हणिल्लें. (म्हणल्यार बायलेक दुय्यम लेखपी मानसिकताय अमेरिकेंतूय आसा तर?) आतां कमला हांचे बाबतींतूय हें घडुं येता. नेमकें कितें जातलें तें 4 नोव्हेंबराक मतदान जाले
उपरांतूच कळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
